„J wish you were here“
Седам со Драган Илиевски во неговата славна кафеана „Вршац“ и со трема поставувам прашања, за неговото синче Влатко Илиевски. Сум работел и сум се среќавал со илјадници луѓе од најразлични националности и професии во Македонија и на разни страни на светот. Драган е еден од ретките кој со најразлични емоции во себе, успева да го одржи својот дигнитет и интегритет. Редок пример за достоинствен приватен и професионален живот. И секогаш вистински татко.
Влатче со гитара и пиано почнал музички да расте на девет години. На 12-годишна возраст пее во локални бендови. Во 2000 година со бендот Made in Macedonia на Македонскиот Рок Фест, освојува две награди. На 15-годишна возраст станува пеач во хард рок групата Морал и настапува како предгрупа на светскиот бенд Deep Purple! Настапувал со Горан Бреговиќ, Кемал Монтено и други мега ѕвезди. Уште од тинејџерските години, заради неговиот вокален стил и харизма, наречен е македонски Jon Bon Jovi!
Неговите песни се популарни и достигнуваат врвови на националните топ-листи. Нашиот Влатко Илиевски е еден од ретките што успеале да ја исполнат арената Борис Трајковски со над 10.000 луѓе! Во Охрид Фест 2009 година ја освојува првата награда со песната „За љубов се пее до крај“. Убедливо негови се и Македонските радио хит награди за 2009 и 2010. Блеснува со прекрасна вокална и сценска изведна на Евровизија 2011 со песната „Русинка“. Неговите последни синглови „Македонка“ и „Вива Македонија“ ги посвети на својата татковина.
Неколку пати, долго сме разговарале за музика и театар. Влатко беше паметен, повеќе прашуваше отколку што зборуваше. И за разлика од мене и безброј како мене, тој уште на мла-ди години ја научил вештината на внимателно слушање, што е вистинска реткост и уметност. И што е најважно и најдрагоцено: И покрај толкавата слава и популарност, до последниот здив остана обичен дечко од нашата улица во Дебар Маало. Еднаш со воодушевување ги коментиравме и Пинк Флојд. Ни во најцрните прогнози никој не можеше ни да помисли, дека нивната песна некогаш ќе биде наслов на овој текст. А уште помалку дека ќе биде како епитаф за неговата чиста и скромна душа.
На 6 јули 2018 година се пресели на небото. Беше славен, популарен и сакан кај девојките, децата и возрасните. Но секогаш беше и остана ист. Талентиран, убав, шармантен, љубезен, воспитан, културен, срдечен и дружељубив!
Влатче, секогаш ќе живееш во нашите најубави спомени!
