Градоначалникот на Град Скопје, Орце Ѓорѓиевски извести дека утрово на покана на поглаварот на Македонската православна црква – Охридска Архиепископија, г.г. Стефан, присуствувал на свечената Велигденска литургија во Соборниот храм во Скопје, каде што во молитва и духовна радост се собраа голем број верници.
„Со вера во срцето, тие дојдоа да ја споделат најрадосната вест, да се причестат и да бидат поблиску до Бога, исполнети со надеж, љубов и мир.
Велигден е празник над празниците, темелот на нашата вера и вечен симбол на победата на животот над смртта, на светлината над темнината и на надежта над очајот.
Ден кога човештвото ја добива најголемата утеха и најсилната порака, дека љубовта Божја е посилна од сè и дека секое страдање има своја смисла, а секоја жртва, своја светлина.
Без молитва, без пост и без искрено покајание, човекот тешко може да го пронајде вистинскиот мир во себе. Деновите што изминаа беа време на тишина, преиспитување и духовно очистување, пат што нè води кон обновување на душата. Токму затоа денес, со чисто срце и отворена душа, го славиме Воскресението Христово, носејќи ја во себе радоста што нè обединува и нè прави подобри луѓе.
Нека овој светол празник ни донесе здравје, љубов и благосостојба, нека ни ја зацврсти верата и нека нè поттикне на добрина, разбирање и човечност.
Да си подадеме рака еден на друг, да простиме, да помогнеме и да продолжиме напред со надеж и вера“, порача Ѓорѓиевски.
