Во тек се работи за унапредување и надградба на безбедносните системи на северниот влез на Белата куќа, а проектот се очекува да биде завршен до средината на септември, соопшти претставник на американската администрација.
Работите се изведуваат на главниот влез на претседателската резиденција, но засега не се објавени детали за конкретните безбедносни подобрувања. Просторот е покриен со големи церади со отпечатени мотиви од столбови и осветлување за да се задржи препознатливиот изглед на објектот.
Проектот се реализира паралелно со реставрацијата на камените столбови на предната страна на Белата куќа, каде што кон крајот на јуни беа поставени скелиња. Од Белата куќа посочуваат дека станува збор за редовни градежни активности.
Администрацијата на претседателот Доналд Трамп предложи и дополнителни мерки за безбедност, меѓу кои е можноста за поставување трајни огради околу паркот Лафајет, како и долж дел од Пенсилванија авенија пред Белата куќа.
Според доставената документација до Комисијата за ликовни уметности, планирани се дискретни огради, системи за видеонадзор и аларми што ќе овозможат привремено затворање на просторот кога тоа ќе биде неопходно. Предлогот треба да биде разгледан на седница на Комисијата на 16 јули.
Во меѓувреме, администрацијата реализира и други градежни проекти во комплексот на Белата куќа, меѓу кои изградба на гранитна платформа за претседателскиот хеликоптер „Марин Ван“, планови за нова свечена сала, како и уредување на Розовата градина, поставување нови јарболи за знамиња и дополнителни елементи долж колонадата на Западното крило.
