Компанијата xAI повеќе не постои како посебен ентитет. Пет месеци по спојувањето со SpaceX, компанијата на Илон Маск официјално го промени своето име во SpaceXAI.
Маск објави во мај дека xAI ќе стане дел од SpaceX, а сега промената е формализирана, објавува Engadget. Во објава на социјалната мрежа X, беше соопштено дека компанијата сега ќе работи под името SpaceXAI, заедно со воведувањето на ново лого.
Поранешниот профил на xAI на мрежата X веќе носи ново име, додека SpaceX сè уште има посебна сметка посветена на објави за ракети, вселенски летови и лансирања.
We are now @SpaceXAI. pic.twitter.com/ema66xDWC9
— SpaceXAI (@SpaceXAI) July 6, 2026
Кога SpaceX го купи xAI во февруари, Маск рече дека глобалната побарувачка за електрична енергија потребна за развој на вештачка интелигенција не може да се задоволи на долг рок само со земски решенија. Според него, преместувањето на енергетски дата центри со огромни барања во вселената е „единственото логично решение“.
Затоа SpaceXAI развива амбициозен план за изградба на орбитални дата центри. Дури и пред официјалното спојување, SpaceX поднесе барање до Федералната комисија за комуникации на САД (FCC) за лансирање на дури еден милион сателити што би претставувале основа за вселенски компјутерски центар.
Треба да се потсетиме дека xAI ја презеде социјалната мрежа X во 2025 година, па сега е и таа под новиот бренд SpaceXAI.
SpaceX, заедно со xAI и X, излезе на берза во јуни оваа година. Акциите завршија со тргување по цена од 161 долар, што ѝ даде на компанијата импресивна пазарна вредност од 2,1 билиони долари.
Иако новото име сè уште не е целосно вклучено во сите официјални регулаторни документи, веб-страницата на поранешната xAI веќе го прикажува новиот идентитет и име на компанијата SpaceXAI.
