Изјавата на министерот за дигитална трансформација дека изградбата на дата центри нема да ја загрози животната средина доколку се почитуваат стандарди отвора едно многу важно прашање – кои стандарди, каде се тие и кој ќе гарантира дека ќе се почитуваат?, прашува ДОМ.
„ДОМ не е против дигиталната трансформација. Напротив, Македонија има потреба од современа дигитална инфраструктура и технолошки развој. Но, зелениот и дигиталниот развој мора да одат заедно.
Во последните години сведоци сме на бројни случаи во различни области за кои институциите требаше да гарантираат дека нема да имаат негативни последици, а подоцна јавноста плаќаше висока цена поради недоволна транспарентност, слаб инспекциски надзор и недоследно спроведување на законите.
Токму затоа не се доволни политички уверувања дека „нема да има штета“. Потребни се јасни и јавно достапни правила.
ДОМ бара Владата да одговори на неколку клучни прашања:
• Дали веќе постојат јасно дефинирани еколошки критериуми за избор на локации за дата центри?
• Дали за секој проект ќе биде задолжителна проценка на влијанието врз животната средина согласно природата и карактеристиките на самиот проект?
• Дали ќе се објавуваат анализи за потрошувачката на електрична енергија и вода, како и мерките за нивно одржливо користење?
• Каков ќе биде системот за контрола и надзор врз работењето на дата центрите?
• Дали Македонија ќе ги следи најдобрите европски практики и стандарди за енергетска ефикасност, користење обновливи извори на енергија и одржливо управување со ресурсите?
Дата центрите можат да придонесат за развој на дигиталната инфраструктура, но тие истовремено претставуваат значителни потрошувачи на електрична енергија и вода. Затоа нивното планирање не смее да се сведува на политички изјави, туку мора да биде засновано на научни анализи, транспарентност и строги еколошки критериуми.
ДОМ нема да прифати и поддржи било каков проект што се темели на ветувања наместо на јасни правила, независен надзор и целосна отчетност пред јавноста.
Дигиталната иднина на Македонија мора да биде одржлива, зелена и во интерес на сите граѓани, а не на поединечни приватни интереси“, велат од ДОМ.
