Жена од Минесота стана вирална интернет-сензација благодарение на нејзината полициска фотографија, која неверојатно потсетува на латино-дивата и светска поп-ѕвезда Џенифер Лопез, објави NY Post.
Триесет и петгодишната Сирена Ен Кваст беше уапсена на 30 август под обвинение за кражба на две пакувања со по две батерии за електричен алат – во вредност од приближно 580 долари – од продавница во Монтичело, според кривичната пријава објавена од „The Watch MN“.
Minnesota shoplifter’s mugshot goes viral for striking resemblance to Jennifer Lopez https://t.co/idTVZ6D5xj https://t.co/duouBfbLc3
— New York Post (@nypost) September 17, 2026
Според информациите, вработен во продавницата ја препознал жителката на Сент Клауд од кражба што се случила два дена претходно и веднаш ја известил полицијата. Кваст наводно ја признала кражбата и, според евиденцијата достапна онлајн, подоцна била официјално обвинета.
Сепак, нејзината наводна склоност кон крадење падна во втор план. Главна тема на социјалните мрежи стана нејзината неверојатна сличност со суперѕвездата, забележана на полициската фотографија објавена од Канцеларијата на шерифот на округот Рајт.
Корисниците на социјалните мрежи масовно споделуваа објави со хумористични коментари: „На момент помислив дека е Џеј Ло“, „Има грешка во матрицата“.
Многу фанови ја искористија можноста да се пошегуваат на сметка на нејзиниот изглед, инспирирани од стиховите на култниот хит на Џенифер Лопез од 2002 година, „Jenny from the Block“: „Во затвор ја знаат како Џени од Блок Д!“ и „Џени малку премногу шета низ блокот“.
Кваст била пуштена на слобода ден по нејзиното апсење, пренесува „Дејли мејл“. Сепак, полициските досиеја покажуваат дека ова не е нејзина прва средба со законот, бидејќи претходно била апсена за низа прекршоци, вклучувајќи поседување дрога, возење во алкохолизирана состојба, бегање од полицијата и давање лажни податоци за идентитетот.
