Петнаесеттата Европска ноќ на литературата ќе се одржи на 1 октомври, со почеток во 18:00 часот и ќе трае до 21:20 часот.
Нетипичните места за литература во Софија ќе станат „читателски гнезда“ во кои различни познати лица ќе читаат извадоци од современи европски книжевни дела. Ќе се слушнат извадоци од преведени книги од Австрија, Белгија, Бугарија, Германија, Грција, Данска, Ирска, Шпанија, Италија, Холандија, Обединетото Кралство, Полска, Македонија, Словенија, Украина, Унгарија, Финска, Швајцарија, Шведска и Чешка.
Македонското читателско гнездо и оваа година ќе биде во клубот „Паве“ на ул. „Вилијам Гладстон“ бр. 68, во зградата на Столична библиотека. Ѓорѓи Георгиев – Антика и Игор Дамјанов ќе читаат извадок од книгата „Снегот во Казабланка“ од македонската писателка Кица Колбе, која излезе од печат оваа година од бугарската издавачка куќа „Изида“, превод на Маријан Петров.
„Ноќ на литературата“ е гласот на современата европска литература. Настанот ги презентира нејзините теми, јазици и писателски ракописи.
„Снегот во Казабланка“ ја освои најпрестижната македонска награда за литература, „Роман на годината“. Делото има јасно изразена поетска, симболична и алегориска природа. Тоа е повеќеслојна приказна што ги испитува некои клучни теми од културниот дијалог меѓу Западна Европа и „варварскиот“ Балкан. Главните ликови, Дина Аспрова и Дејвид Розенблат, се млади македонски творци кои одат во Западна Европа затоа што веруваат дека таму припаѓаат. Тие доживуваат криза на идентитетот. По многу години и од разни лични причини, тие се враќаат дома, каде што се соочуваат со себеси и со своето минато. Темите за различните видови љубов, егзил, дом, припадност и траумите од војната се централни за романот.
Кица Колбе е родена во 1951 година во Башино Село. Нејзините корени се од Егејска Македонија. Студирала филозофија на скопскиот и белградскиот универзитет. Докторатот го одбранила на тема за германска естетика од XVIII век. Предава на Филозофскиот факултет во Скопје. Од 1986 година живее во Германија. Таму се посветува на литературата. Нејзиното деби беше со „Егејци“, современ текст за траумата и егзилот – текст силно под влијание на филозофијата на Теодор В. Адорно. Нејзиниот роман „Снегот во Казабланка“ ја освои наградата „Роман на годината“ за 2006 година. Некои литературни критичари го сметаат за еден од првите примери на „женско пишување“ во нејзината татковина. Нејзиниот следен роман, „Жените Гаврилови“, беше номиниран за наградата „Балканика“.
