Со години, GTA 6 се најавува како потенцијален рекордер за најголемо лансирање во историјата на индустријата за забава, како во поглед на очекувањата, така и во однос на инвестициите во развојот. Rockstar продолжува да ја поттикнува оваа возбуда.
Според еден од клучните луѓе во студиото, целта е да се подигне речиси секој аспект од претстојната игра на ново ниво. Арон Гарбут, шеф за развој и еден од челниците во Rockstar, вели дека тимот се обидел огромниот притисок околу проектот да го претвори во дополнителна мотивација.
Наместо да прават компромиси меѓу големината на светот, деталите и интерактивноста, тие се стремеле истовремено да ги подобрат сите овие елементи.
„Обично мора да правите компромис меѓу обемот и деталите, или меѓу деталите и интерактивноста. Со овој проект, тргнавме во спротивна насока“, изјави Гарбут за Game Informer.
Тој истакнува дека Rockstar го зголемил нивото на детали, обемот, опсегот, големината, интерактивноста и густината на светот – подобрувања што треба да бидат очигледни во секој аспект од играта.
GTA 6 ветува огромен отворен свет, подетална средина, напредна физика и поголем број интерактивни елементи. Иако Rockstar сè уште не открил сè, досега објавените трејлери веќе навестуваат неверојатно внимание посветено на деталите.
Секако, зад проект од вакви размери стојат огромните финансиски ресурси на издавачот Take-Two Interactive. Иако точниот буџет за GTA 6 не е јавно потврден, јасно е дека станува збор за еден од најамбициозните проекти во историјата на индустријата за видеоигри.
Rockstar е познат по тоа што со години ги развива своите игри и вложува огромно време во светот, анимациите, физиката и деталите; следствено на тоа, Гарбут смета дека GTA 6 претставува нешто што Rockstar досега никогаш го нема направено.
„Не мислам дека некогаш сме направиле нешто што е дури и приближно на ова“, рече тој.
