ИКАРУС Еlectric Zrt во заедничка понуда со ЕВН достави најниска понуда на електронската аукција за набавка на 150 електрични автобуси и 75 станици за полнење, соопшти Министерството за транспорт.
На јавниот повик понуди доставиле четири компании – Xiamen Golden Dragon Bus Co., Ltd., YES-EU DENMARK A/S YUTONG, BMC Otomotiv Sanayi ve Ticaret Anonim Sirketi и IKARUS Electric Zrt во заедничка понуда со ЕВН.
По евалуацијата, Комисијата за јавни набавки утврдила дека условите за учество на електронската аукција ги исполнуваат две понуди – BMC Otomotiv Sanayi ve Ticaret Anonim Sirketi и IKARUS Electric Zrt во заедничка понуда со ЕВН.
Според резултатите од електронската аукција, најниска цена понудила IKARUS Electric Zrt во заедничка понуда со ЕВН – 3.120.956.004 денари без ДДВ, односно 19.796.924 денари без ДДВ по автобус и 2.018.899 денари без ДДВ по станица за полнење, соопшти Министерството за транспорт.
Комисијата предложила избор на оваа понуда како најповолна, по што следува рок од 10 дена за поднесување жалби.
Доколку биде склучен договорот, избраниот понудувач ќе треба да ги испорача автобусите и станиците за полнење во три фази: 30 електрични автобуси и 15 станици за полнење во рок од шест месеци; 60 автобуси и 30 станици во рок од дванаесет месеци; уште 60 автобуси и 30 станици во рок од осумнаесет месеци од склучувањето на договорот.
Министерството за транспорт информира дека постапката продолжува согласно Законот за јавни набавки, по истекот на рокот за жалба.
