Министерот за внатрешни работи Панче Тошковски денеска го посети фестивалот „Мото Илинден Урбан драјв“, кој од 1 до 4 октомври се одржува на паркингот пред Спортскиот центар „Борис Трајковски“ во Скопје. Во фокусот на фестивалот, покрај промоцијата на мотоциклизмот, е подигнувањето на свеста за безбедно учество во сообраќајот, соопшти МВР.
Во рамки на фестивалот се организираат тест-возења, работилници за безбедно управување со мотоцикл, едукација на почетници, како и активности за правилна употреба на заштитната опрема и запознавање со законските прописи од областа на сообраќајот. Во едукативниот дел е вклучен и Републичкиот совет за безбедност на сообраќајот на патиштата.
Тошковски ја поздравил иницијативата и посочил дека едукацијата, личната одговорност и почитувањето на сообраќајните правила се клучни за поголема безбедност на мотоциклистите, кои се меѓу најранливите учесници во сообраќајот.
„Љубовта кон моторите, адреналинот и слободата што ја носи мотоциклизмот секогаш мора да одат заедно со одговорноста. Кацигата и заштитната опрема, почитувањето на ограничувањето на брзината и сообраќајните правила не се формалност, тие спасуваат животи. Затоа ваквите настани се важни, особено за младите и за оние кои првпат влегуваат во светот на мотоциклизмот“, истакнал Тошковски.
Од МВР информираат дека континуирано се спроведуваат засилени акциски контроли во сообраќајот, вклучително и контроли насочени кон возачите на мотоцикли и мопеди, со посебен акцент на брзината, поседувањето соодветна возачка дозвола, употребата на заштитна кацига и почитувањето на останатите сообраќајни правила.
Како дополнителен чекор во оваа област, од МВР го посочуваат системот „Безбеден град“, кој ги детектира и прекршоците сторени од возачи на мотоцикли. Со помош на вештачката интелигенција, системот наскоро ќе може да ги казнува и оние кои не носат кацига и со тоа го загрозуваат својот живот и животот на другите учесници во сообраќајот.
Тошковски посочил дека резултатите од новиот пристап кон сообраќајната безбедност веќе се видливи. Според него, во првите девет месеци од годинава има 33 жртви помалку во сообраќајот во споредба со истиот период минатата година, односно околу 30 проценти помалку загубени човечки животи.
Бројот на повредени лица, како што навел, е намален за околу 19 проценти, а во позитивниот тренд се вклучени и сообраќајните незгоди во кои учествуваат мотоциклисти.
„Овие резултати не се само бројки. Зад секоја бројка стои човечки живот, семејство и нечија иднина. „Безбеден град“, засилените контроли, едукацијата и, пред сè, одговорното однесување на граѓаните покажуваат дека можеме суштински да ја промениме сообраќајната култура. Нашата цел е јасна – помалку незгоди, помалку повредени и што е можно помалку загубени човечки животи“, порачал Тошковски.
МВР најавува дека ќе продолжи со превентивните активности, едукацијата, засилените контроли и примената на современи технологии, со цел поголема безбедност за сите учесници во сообраќајот.
