Британскиот премиер Енди Бурнам најави дека ќе претстави опции за нови односи со Европската унија, вклучително и можноста Обединетото Кралство повторно да се приклучи кон блокот.
Бурнам смета дека Брегзит предизвикал „повеќе штета отколку корист“. Се очекува неговата влада да ги разработи овие детали пред самитот ЕУ-Обединето Кралство што ќе се одржи во Брисел во ноември, пренесува Euronews.
„Треба да видиме што е изводливо и кои се предностите и недостатоците на секое решение“, изјави Бурнам претходно оваа недела. Во Брисел, тој првично се доживуваше како некој што е помалку фокусиран на меѓународните прашања од неговиот претходник, Кир Стармер. Сепак, неговата подготвеност да го покрене прашањето за повторно зачленување во ЕУ – и покрај политичките ризици – ги промени очекувањата во врска со најавеното „ресетирање“ на односите.
„Ова беше храбар политички потег“, изјави претставник на ЕУ. „Тоа сега ја отвора вратата за многу поамбициозен пристап.“
Сепак, официјалните лица приватно признаваат дека Лондон треба многу појасно да ги дефинира посакуваните исходи и нагласуваат дека принципите утврдени за време на преговорите за Брегзит остануваат на сила. „Бурнам сега мора да разјасни што точно мисли“, изјави за Euronews Сандро Гози, водечкиот член на Европскиот парламент задолжен за односите со Обединетото Кралство. „А ние, од наша страна, треба да покажеме отвореност кон нов вид партнерство.“
Бурнам рече дека најамбициозната опција е повторно зачленување во Европската унија, но додаде дека сè уште не е време за нов референдум за Брегзит. Британските официјални лица велат дека Бурнам би можел да ги искористи општите избори во 2029 година за да ја тестира јавната поддршка за овој потег, претворајќи го Брегзит во централно прашање на кампањата. Неодамнешните анкети покажуваат дека мнозинството британски гласачи би поддржале враќање во ЕУ. Ветувањето за враќање во Унијата би можело да одврати дел од традиционалните гласачи на Лабуристите кои го поддржаа Брегзит и да ги насочи кон Конзервативците или кон партијата „Реформ УК“ (Reform UK) на Најџел Фараж.
Од друга страна, тоа би можело да ги придобие проевропски ориентираните гласачи од левицата. Барнам ја презеде функцијата претходно оваа година, во време кога Лабуристите се соочуваа со растечката популарност на партијата „Реформ УК“. Неговиот претходник, Кир Стармер, беше критикуван поради претпазливиот и нејасен став кон Брегзит; тој се залагаше за посилни врски со Брисел, но ја исклучуваше можноста за повторно зачленување.
фото/ЕПА
