Премиерот, Христијан Мицкоски, даде краток коментар во врска со аферата за шпионажа во кабинетот на претседателката, Гордана Сиљановска – Давкова. Тој кусо рече дека станува збор за „глодари“ и за „шпионски талог во општеството“. Мицкоски го спомена и шефот на Обвинителството за гонење организиран криминал и корупција, Ислам Абази, за кој рече дека шири паника во јавноста.
„Тоа се шпионски талог на општеството, структури од минатото коишто се наоѓале во кабинетите како глодари на некои поранешни политичари, претседатели, премиери и така натаму, и тие се претставуваат како поранешни вработени и испраќаат анонимни дописи до обвинителствата. Се разбира, таму е Ислам Абази да истрча и да создаде паника во јавноста дека нешто се случувало“, рече Мицкоски.
Тој додаде дека повеќе не би ги коментирал лицата, кои ги нарече глодари.
„Јас не би ги коментирал овие глодари, бидејќи мислам дека треба да ги заборавиме“, рече Мицкоски.
Претходно денеска, Основното јавно обвинителство за гонење на организиран криминал и корупција соопшти дека веќе подолг период нема повратна информација од Министерството за внатрешни работи во врска со сомнежите за оддавање службени тајни и можни шпионски активности во Кабинетот на претседателката, Гордана Сиљановска-Давкова.
