Ситуацијата околу Кристијано Роналдо и селекторот на Португалија, Жорже Жесус, не се смирува и по објавата на фудбалерот во која се извини за целата ситуација.
Еден од најдобрите фудбалери на сите времиња изјави дека Жесус го прекршил договорот во два наврати, додека особено го погоди фактот што тренерот за време на прес-конференцијата не спомена ниту една од осумте точки од документот што, според Роналдо, тој лично ги одобрил.
Португалските медиуми објавија дека Роналдо ја следел конференцијата на Жесус и очекувал тренерот јавно да каже „извини“.
Бидејќи тоа не се случило, следела одлуката да го напушти репрезентативниот табор.
Поради сето ова, очекувана беше реакцијата на Жорж Жесус, познат по својот темпераментен карактер и бројните конфликти со играчите и раководствата на клубовите во кои работел во текот на кариерата.
„Бев во Леирија и го гледав натпреварот на репрезентацијата на Португалија до 21 година. Сега ќе го прочитам соопштението. Немам што да кажам“, кратко рече Жесус.
Да ве потсетиме дека конфликтот започна по натпреварот помеѓу Португалија и Норвешка.
Според претходниот договор меѓу селекторот и Роналдо, капитенот на репрезентацијата требало внимателно да ги дозира минутите за време на оваа репрезентативна акција.
Првичниот план бил Роналдо да не игра против Норвешка, со оглед на тоа што само неколку дена претходно одиграл 67 минути против Велс.
Сепак, Жесус проценил дека напаѓачот на Ал Наср е доволно подготвен повторно да игра. Роналдо бил испратен на загревање, но на крајот не влезе во игра.
Токму тој момент бил вовед во нова тензија, која потоа кулминирала со неговото напуштање на таборот на репрезентацијата. По јавниот настап на Роналдо, Жесус решил да не ја разгорува контроверзноста дополнително.
Неговата кратка реакција, со оглед на темпераментот што го придружува во текот на целата негова тренерска кариера, дополнително го привлече вниманието на португалската јавност.
Foto/ Depositphotos
