Случајот „Негреира“, еден од најголемите скандали во историјата на шпанскиот фудбал, е сè уште во фокусот, а Реал Мадрид ја продолжува својата правна битка за да ги расветли сите околности.
Според шпанските медиуми, „кралскиот клуб“, побарал од истражниот судија да ја добие од Барселона целосната документација за системот за усогласеност со деловните прописи за периодот од 2010 до 2018 година.
Целта е да се утврди какви контролни механизми постоеле за спречување на корупцијата во спортот и дали тие всушност биле применети.
Според новинарот Хави Естрада, а потврдено од локални извори, Реал Мадрид во својот поднесок тврди дека имало сериозни структурни недостатоци во тогашната Шпанска фудбалска федерација и Судиската комисија што му дозволиле на спорниот систем да функционира со години.
Во документот се споменува и моделот за евалуација на судиите, кој, според тврдењата на Реал, се базирал на самоволие и клиентелизам.
Дополнително, Реал Мадрид бара од Цивилната гарда да достави фактури, овластувања за плаќање, интерна документација и ревизорски извештаи на компаниите Тресеп, Радаманто и Бест Нортон. Овие документи беа претходно побарани за време на истрагата, но сè уште не се во судското досие.
Од Реал бараат да се вклучи и УЕФА во целиот спор, односно да и ги одземе сите титулина Барселона освоени во наведениот период. Станува збор за 33 трофеи, два од нив се во Лигата на шампионите.
Односите меѓу двата најголеми шпански клуба се исклучително затегнати веќе долго време, а случајот „Негреира“ дополнително го продлабочи јазот меѓу Реал и Барселона. Мадрид постојано повторуваше дека ќе истрае во своите напори да ги утврди сите факти во оваа постапка.
Што е случајот со „Негреира“?
Барселона е обвинета дека во текот на годините платила 8,4 милиони евра на компании поврзани со Хозе Марија Енрикез Негреира, поранешниот потпретседател на Техничкиот комитет на судии во Шпанската фудбалска федерација, и дека на тој начин влијаеле врз судискиот систем и го нарушиле интегритетот на натпреварувањето.
Foto/ Depositphotos
