Фудбалскиот клуб Манчестер Сити потврди дека поднел жалба против одлуката на независната комисија, која го прогласи клубот за виновен по сите точки од обвинението за кршење на финансиските правила на Премиер лигата, објавија британските медиуми.
Клубот во кратко соопштение изјави дека одлуката на комисијата содржи „јасни материјални грешки во правото, принципите и фактите“ и дека затоа „не е одржлива“, пренесува Би-Би-Си.
Сити повторно нагласи дека не е виновен и изјави дека за време на постапката поднел „сеопфатен сет на неоспорни докази“ за да ги поткрепи своите ставови.
Фудбалската асоцијација на Англија (ФА) објави дека пресудата има „значајни импликации за интегритетот на играта“, истакнувајќи дека внимателно ја разгледува одлуката и нејзините можни последици.
„Бидејќи постапката меѓу Премиер лигата и Манчестер Сити е сè уште во тек, во овој момент нема да коментираме понатаму за случајот. Сепак, ќе продолжиме внимателно да го следиме развојот на ситуацијата“, се вели во соопштението на ФА.
Сити е прогласен за виновен по сите точки од обвинението за кршење на финансиските правила на Премиер лигата од сезоната 2009/10. до 2017/18. Според извори на Би-Би-Си Спорт, се очекува клубот во жалбата конкретно да се осврне на тврдењето дека клучните спонзорски договори биле финансирани од властите во Абу Даби, а не од сопствениците на клубот.
Независната комисија, меѓу другото, откри дека Сити користел „фиктивни договори“ со одредени комерцијални партнери за да прикрие тајно финансирање вредно повеќе од 830 милиони фунти.
Премиер лигата тврди дека клубот „систематски ги кршел правилата речиси една деценија“.
Случајот го привлече вниманието и на британските даночни власти. Комитетот на британскиот парламент задолжен за надгледување на работата на Даночната и царинската администрација (HMRC) побара информации за тоа дали таа институција ја побарала документацијата што беше затемнета во објавениот извештај на комисијата.
Како дел од жалбената постапка, се очекува и прашањето за спонзорските договори со компании поврзани со Абу Даби. „Етихад ервејс“, еден од главните спонзори на клубот, изјави дека разгледува правна постапка против Премиер лигата и категорично ги отфрли тврдењата дека е вклучен во какви било несоодветни комерцијални договори.
Foto/ Depositphotos
