Две лица загинаа, а 11 членови на екипажот беа спасени денеска по пожар на товарен брод во Црното Море, надвор од романските територијални води. Романските власти засега не ја потврдија причината за пожарот, додека украинскиот претседател Володимир Зеленски тврди дека бродот бил погоден од двe руски беспилотни летала.
Романското Министерство за внатрешни работи соопшти дека 11 членови на екипажот биле спасени од бродот, кој потоа потонал. Романската поморска управа соопшти дека станува збор за товарниот брод „Ројад Мамадов“.
Според Зеленски, бродот бил погоден од два руски дрона додека превезувал пченка.
„Страшен напад со два руски беспилотни летала врз цивилен брод во неутрални води, кој превезувал пченка и е во турска сопственост. На бродот имало државјани на Азербејџан и Индија“, напиша Зеленски на Икс.
Во моментот кога ја објавил пораката, Зеленски навел дека е потврдена смртта на капетанот, додека судбината на уште едно лице сè уште се утврдувала.
Романските власти подоцна потврдија дека во инцидентот загинале две лица.
Руските власти засега не го коментираа конкретно овој инцидент. Руското Министерство за одбрана претходно соопшти дека руските сили погодиле два товарни брода, но не наведе дека „Ројад Мамадов“ бил еден од нив.
Романските медиуми објавија дека инцидентот се случил во близина на нафтена платформа со која управува романската енергетска компанија ОМВ Петром.
Бродот „Ројад Мамадов“ пловел под знамето на Сент Китс и Невис и се движел кон Равена во Италија. Според податоците на VesselFinder, последно пристанал во украинското пристаниште Измаил.
Романија, која е членка на НАТО, со Украина дели 614 километри копнена граница. Од почетокот на руската инвазија врз Украина во 2022 година се регистрирани повеќе случаи на навлегување руски беспилотни летала во романскиот воздушен простор, како и пловечки мини во Црното Море, кои претставуваат ризик за важните трговски и енергетски правци.
