Шпанските власти денови однапред биле предупредени за ризикот од масовен прилив на мигранти кон северноафриканската ексклава Сеута, но според повеќе воени и цивилни разузнавачки извори, не презеле навремени мерки за спречување на кризата.
Предупредувањата пристигнале и непосредно пред масовното преминување на границата од Мароко, при што десетици илјади луѓе влегле на шпанска територија.
Според информациите до кои дошле медиумите, разузнавачките служби предупредиле дека мароканскиот крал Мохамед VI би можел да направи „гест на великодушност“ на границата по повод прославата на мароканскиот Ден на престолот. Потоа следувале извештаи за мигранти кои пливаат од градот Фнидек кон Сеута, како и за автобуси кои превезуваат луѓе кон граничната зона.
Во десетте дена пред ескалацијата, во Сеута по морски пат пристигнале речиси 1.000 луѓе. Разузнавачките служби тоа наводно го оцениле како тест на реакцијата на мароканските власти и проценката била доставена до шпанската влада.
Сепак, подоцна во шпанската ексклава влегле меѓу 60.000 и 75.000 мигранти, што претставува најголема мигрантска криза во историјата на градот. Според податоците на шпанското Министерство за внатрешни работи, околу 53.000 лица биле вратени во Мароко во следните денови.
Припадниците на Цивилната гарда и Националната полиција на граничниот премин Тарахал не успеале да го запрат приливот на луѓе. Според повеќе извори, нивниот приоритет бил да им помогнат на повредените, додека дел од службениците ја критикувале одлуката на Мадрид што не испратил војска веднаш, иако воените единици во Сеута и Мелиља биле во состојба на подготвеност.
„Тие можеа да бидат мобилизирани без претходни состаноци, само со политичка одлука и наредба од оперативното командување“, изјавиле извори за медиумите.
Според сведоштва од терен, мароканската жандармерија мирно набљудувала додека мигрантите се обидувале да ја преминат границата – дел пливајќи покрај насипот, а дел преку огради и покриви на пристапните патишта.
Од Цивилната гарда оценуваат дека ситуацијата е различна од мигрантската криза во мај 2021 година, кога Мароко ги ублажи граничните контроли како дипломатски одговор на одлуката на Шпанија да го прими лидерот на Фронтот Полисарио, Брахим Гали.
Овојпат, според изворите, бројот на лица кои пристигнувале во Сеута по морски пат растел со недели, делумно поради одлуката на шпанскиот Врховен суд со која се ограничува моменталното враќање на мигрантите кои стигнале до шпанска територија со пливање.
Шпанскиот премиер Педро Санчез масовниот влез на мигранти го оцени како „повреда на територијалниот интегритет на Шпанија“ и за кризата ги обвини мрежите за шверц на луѓе, тврдејќи дека тие ја искористиле судската одлука и ги поттикнале илјадниците мигранти да се обидат да ја преминат границата.
Санчез истакна дека мароканските власти од почетокот соработувале „брзо и доследно“, а Министерството за внатрешни работи најави зајакнување на контролите на границата.
Сепак, според извештаите, засилувањето се свело на испраќање околу 30 дополнителни службеници и еден брод, кој неколку дена подоцна се расипал. Армијата и дополнителни сили на полицијата биле повикани дури во доцните часови на четврток, откако кризата веќе ескалирала.
