Белгискиот министер за надворешни работи Максим Прево го осуди оддавањето почит на осудениот воен злосторник Ратко Младиќ, предупредувајќи дека чинот дополнително ја оддалечува Србија од фундаменталните вредности на Европската Унија, јавува агенцијата Анадолија.
„Го осудувам овој чин најостро и утрово му ја пренесов оваа порака на мојот српски колега задолжен за европски прашања“, напиша Прево на платформата Икс.
🇷🇸 Ratko Mladić is a convicted war criminal. The Butcher of Bosnia was found guilty of committing war crimes, crimes against humanity and genocide. He epitomises some of the worst atrocities of our European history, not least the genocide of Srebrenica. It is shameful and…
— Maxime PREVOT (@prevotmaxime) September 4, 2026
Тој додаде дека оддавањето почит на Младиќ, кој беше осуден за воени злосторства, злосторства против човештвото и геноцид, е срамно и непочитување кон жртвите и нивните семејства.
Прево истакна дека чинот означува „чекор што ја оддалечува Србија од фундаменталните вредности на ЕУ за почитување на човековото достоинство, човековите права и борбата против неказнивоста“.
Тој предупреди дека тоа „оди во спротивна насока од она што се очекува од земја кандидат за ЕУ“.
