Германските истражители пронајдоа нови можни врски помеѓу неуспешниот напад со дрон со експлозив на аеродромот Лајпциг/Хале и претходните случаи на саботажа во Полска и Србија. Еден од осомничените за нападот во Лајпциг е поврзан со подметнување пожар во продавница за градежни материјали во Лоѓ, Полска, додека истражителите, исто така, конкретно ги анализираат запленетите делови од дронови и експлозиви на српско-унгарската граница. Во двата случаи, се појавува многу сличен метод за правење експлозивна направа, пишува Билд, повикувајќи се на Шпигел и безбедносни извори.
Германските истражители поврзаа еден од осомничените идентификувани досега со пожарот што беше подметнат во продавницата на Лерој Мерлин во Лоѓ во јули 2024 година. Според Шпигел, човекот имал контакти со руските разузнавачки служби. Во тоа време, пожарот првично беше припишан на неправилно складирање на производи за заштита на растенијата и инсектициди, но подоцнежната истрага на полските обвинители го поврза со саботажа.
Случајот на две лица уапсени на границата меѓу Србија и Унгарија
Друга важна трага води до Србија. На 11 јуни, српските безбедносни служби уапсија двајца мажи на границата со Унгарија, кај кои пронајдоа делови од модифициран дрон, предаватели за негово управување и две канти полни со експлозиви.
Станува збор за државјанин на Србија и маж кој има српско и руско државјанство. И двајцата се во притвор.
Германските истражители се особено заинтересирани за сличноста на таа опрема со онаа пронајдена по нападот во Лајпциг. И таму експлозивот бил ставен во метална канта прикачена на дронот. Безбедносните служби сега проверуваат дали двајцата уапсени во Србија се поврзани со лицето кое се појавува и во истрагата за нападот на германскиот аеродром.
Според информациите на „Шпигел“, пренесени од германските медиуми, неколку европски разузнавачки служби имаат информации за најмалку четири мрежи за саботажа кои наводно се под руска контрола и моментално работат во Европската Унија.
Дрон удри во украински „Антонов“, експлозијата била спречена од неисправен детонатор.
Нападот во Лајпциг се случил на 4 август. Истрагата покажала дека дрон со експлозиви летал кон паркирани украински товарни авиони „Антонов“. Според снимките од надзорните камери, дронот удрил во крилото на еден од авионите, но експлозивната направа не детонирала.
Дронот се одбил од крилото и паднал, а на неколку метри оддалеченост била пронајдена конзерва со околу 600 грама високо деструктивен експлозив „Семтекс“. Истражителите веруваат дека експлозијата била спречена од неисправен детонатор.
Случајот можеше да заврши со многу посериозни последици. Авионот во кој удри дронот имал гориво во крилата, а истражителите претходно утврдија дека еден од украинските „Антонови“ превезувал муниција на таа локација претходниот ден. Аеродромот Лајпциг/Хале е важен логистички центар за транспорт на воена помош за Украина и за активностите на НАТО.
