Силна експлозија го потресе Кнежевството Монако вчера вечер, при што беа повредени најмалку три лица, од кои две се во критична состојба. Инцидентот се случил кратко пред 21 часот во станбена зграда на улицата „Реверен Пере Луј Фрола“, во близина на плоштадот Place des Moulins и недалеку од француската граница.
Според првичните информации, се сомнева дека станува збор за терористички напад, а сторителот се бара, пишува „Ле Фигаро“.
Жртвите се членови на украинско семејство
Обвинителот од Монако, Тибо Стефан, потврди дека две лица се во критична состојба, додека третото е надвор од животна опасност. Според информациите од истрагата, сите жртви се членови на истото украинско семејство. Родителите, двајцата во педесеттите години, се во критична состојба, додека нивниот 13-годишен син е во стабилна состојба.
Еден од тешко повредените е украинскиот олигарх Вадим Јермолаев, кој престојува во Монако како „ВИП бегалец“ од почетокот на војната во Украина, изјавил извор близок до истрагата за „Ле Фигаро“. Во времето на експлозијата, тој се враќал во зградата каде што живеат со својот партнер и син.
„Најверојатно терористички напад“
Надзорните камери снимија маж како остава ранец пред влезот во зградата. Експлозивната направа детонирала токму кога семејството влегувало во лобито. Откако ја активирал направата, сторителот избегал пеш кон соседниот француски град Босолеј.
Сè уште не е јасно дали украинското семејство било цел на нападот. Премиерот Кристоф Мирманд рече дека „полицијата моментално собира докази“.
„Најверојатно станува збор за терористички напад“, изјави премиерот Мирманд за АФП. Експерти за деактивирање бомби и службеници на судската полиција се на местото на настанот, а полициски контролни пунктови се поставени на границата со Франција, кај наплатната станица Ла Турби. „Колку што знам, ова е прв пат во историјата да се случи ваков чин во Кнежевството“, рече државниот министер.
At approximately 9:05 p.m. local time, a deliberate explosion occurred on Rue Révérend-Père-Louis-Frolla in Monaco.
CCTV footage captured a man placing a backpack containing a booby-trapped explosive device filled with bolts and metal pellets designed to cause maximum injury to… pic.twitter.com/HyvazIXgAJ— T_CAS videos (@tecas2000) June 29, 2026
Кој е Вадим Јермолаев?
Врз основа на снимките од безбедносните камери, властите објавија опис на осомничениот. Тој е маж облечен во беж панталони, црна јакна и црна шапка што делумно му го покрива лицето. Француските медиуми објавија и фотографија на која наводно се гледа како бега по експлозијата.
Медиумите известуваат дека цел на нападот биле украинскиот бизнисмен Вадим (Владимир) Јермолаев и членовите на неговото семејство.
Јермолаев некогаш беше на листата на 100-те најбогати луѓе во Украина. Тој се откажа од украинското државјанство во 2019 година, кога стана државјанин на Кипар.
Четири години подоцна, украинскиот претседател Володимир Зеленски одобри одлука на Советот за национална безбедност и одбрана за воведување лични санкции врз него.
