Тројца млади мажи и две жени на возраст од дваесет години загинаа во ужасна сообраќајна несреќа во округот Лаут, Ирска, во саботата навечер, соопшти ирската полиција, објави Скај њуз.
Трагедијата се случила кратко по 21 часот во Гибстаун, Дандалк, кога „фолксваген голф“, во кој патувале петмина пријатели на ноќно излегување, се судрил со „тојота ленд крузер“.
Сите петмина патници во „голфот“ загинале на местото на настанот. Жртвите биле Клое Мекги (23) и Шеј Дафи (21), Алан Мекласки (23), Дилан Коминс (23) и Клое Хипсон (21) од Шкотска.
Друг маж, исто така на возраст од 20 години, кој бил во „голфот“, бил извлечен од возилото и однесен во болница со сериозни, но не опасни по живот повреди. Возачот и патникот во „ленд крузерот“ исто така биле хоспитализирани, но со полесни повреди.
Полицискиот службеник Чарли Армстронг изјавил дека истрагата е во тек и ја пофалил професионалноста на службите за итни случаи кои реагирале во исклучително тешки услови.
„Сцената беше многу тешка, во неповолни временски услови, а професионализмот што го покажаа сите служби за итни случаи и грижата и почитта што им беше покажана на петте починати беше примерена“, рекол Армстронг.
Ирскиот премиер Мајкл Мартин изјави дека е „шокиран и запрепастен“ од веста, додека неговиот заменик Сајмон Харис рече дека „превез од длабока тага паднал врз земјата“.
„Нашите мисли и молитви се со семејствата и пријателите на овие млади луѓе, како и со оние што беа повредени. Исто така, мислиме на нашите служби за итни случаи, кои работеа толку професионално во навистина катастрофални околности“, рече премиерот Мартин.
фото: принтскрин
