Советот за безбедност на ОН треба да гласа во вторник за резолуција што би го заштитила комерцијалниот бродски сообраќај во Ормутскиот теснец, но во значително разводнета форма откако Кина со вето се спротивстави на овластувањето за употреба на сила, соопштија дипломати. Цените на нафтата пораснаа откако САД и Израел го нападнаа Иран кон крајот на февруари, предизвикувајќи конфликт што трае повеќе од пет недели и во кој Техеран во голема мера го затвори теснецот, клучна енергетска артерија.
Повеќе нацрти, без договор
Бахреин, кој моментално претседава со 15-члениот совет, врши притисок за усвојување на резолуцијата, вклучувајќи повеќе нацрти што се обидоа да го надминат противењето од Кина, Русија и други. Најновата верзија, која ја виде Ројтерс, изоставува какво било експлицитно овластување за употреба на сила.
Наместо тоа, текстот „силно ги охрабрува државите заинтересирани за користење на комерцијални поморски патишта во Ормускиот теснец да ги координираат напорите, од дефанзивна природа и соодветни на околностите, за да придонесат за обезбедување на безбедноста и сигурноста на пловидбата низ теснецот“.
Во него се вели дека таквите придонеси би можеле да вклучуваат „придружба на трговски и комерцијални бродови“, а текстот, исто така, ги поддржува напорите „за одвраќање на обидите за затворање, нарушување или мешање во меѓународниот превоз низ Ормускиот теснец“.
Потребни се девет гласа за усвојување
Дипломатите рекоа дека разводнетата верзија има поголеми шанси да помине, но останува нејасно дали ќе успее. За усвојување се потребни најмалку девет гласа „за“ и без вето од петте постојани членки – Велика Британија, Кина, Франција, Русија и САД.
Кина: „Ескалацијата е неизбежна“
Минатиот четврток, Кина се спротивстави на резолуцијата со која би се одобрила употребата на сила, велејќи дека тоа би „легитимирало нелегална и неселективна употреба на сила, што неизбежно би довело до понатамошна ескалација и сериозни последици“.
Иран соопшти дека сака траен крај на војната и се спротивстави на притисокот за повторно отворање на теснецот, додека американскиот претседател Доналд Трамп предупреди дека земјата може да биде „уништена“ ако не го исполни рокот од вторник вечерта за договор.
