Француската метеоролошка служба „Метео Франс“ стави три департмани на западот од земјата на портокалово ниво на тревога поради ризик од поплави, беше објавено денес.
Од 10 часот наутро, департманите Ванде и Де-Севр се придружија на Морбижан, кој е под портокалово предупредување од саботата, а според метеоролозите, нивото на реките се зголемува по обилните дождови во текот на претходните денови и вчерашната дождовна епизода, објавува BFM.
„Нивото на водата моментално се зголемува во сите сливови на реките Леј и Севр Нант“, соопшти „Метео Франс“, предупредувајќи дека денес и утре се очекуваат нови нарушувања и значителни врнежи од дожд, што ќе доведе до понатамошно зголемување на нивото на водата во наредните денови.
Посебно внимание е насочено кон областите Сен-Мемен/Сериз, Сен-Лорен-сур-Севр и Мареј-сур-Ле, каде што има зголемен ризик од излевање.
Западниот дел на Франција, особено Бретања, веќе беше погоден од екстремно влажно време во текот на јануари, врнеше речиси два од три дена, а количината на врнежи беше до двојно поголема од месечниот просек.
Слични временски услови продолжија и на почетокот на февруари, со повремени поплави поради веќе заситената почва, пренесува Танјуг.
