Истражување: 76,8 отсто од пилотите во Европа заспале за време на лет

Преморените пилоти претставуваат значителен безбедносен ризик за европската авијација, тврди германскиот синдикат на пилоти „Vereinigung Cockpit“ (VC), повикувајќи се на неодамнешна студија.

Во неодамнешното истражување, тројца од четворица пилоти, 76,8%, изјавиле дека доживеале барем еден случај на „микросон“ (краткотрајно губење на свеста во траење од неколку секунди) за време на лет во текот на изминатите четири недели, соопштија од синдикатот VC. Понатаму, 36,8% од испитаниците навеле дека немале доволно време за одмор за да го спречат наталожувањето на заморот.

Студијата, спроведена за Европската асоцијација на пилоти (ECA) од страна на консултантската куќа „Baines Simmons“, има голема тежина поради големиот број учесници. Вкупно 7.200 пилоти зеле учество, објасни Ања Гранфогл, член на управниот одбор на синдикатот VC, задолжена за безбедност.

„Пилотите се длабоко загрижени поради проблемот со заморот и сметаат дека е потребна итна реакција“, рече таа.

Студијата, исто така, откри значителни недостатоци во културата на пријавување знаци поврзани со замор кои влијаат врз безбедноста.

Само 37,2% од учесниците изјавиле дека навистина пријавуваат кога не се способни за летање поради замор. Речиси една четвртина или 24,2% од испитаниците навеле дека продолжиле да летаат и покрај заморот, без да го пријават тоа, поради страв од санкции или одмазда од страна на раководството.

Синдикатот VC повика на преземање мерки како одговор на овие наоди, кои се слични на резултатите од претходната студија спроведена пред три години.

„Безбедноста на летовите не смее да зависи од економските притисоци со кои се соочуваат авиокомпаниите, ниту пак од храброста на поединечните пилоти“, истакна Гранфогл.

„Авиокомпаниите мора да ги исполнат своите обврски, додека регулаторните тела мора построго да го надгледуваат спроведувањето на постојните прописи и да ги затворат сите правни празнини“, додаде таа.