(Видео) Голем шумски пожар во Калифорнија, наредена евакуација на околу 4.600 луѓе

Наредби за евакуација се издадени за делови од округот Оринџ во американската сојузна држава Калифорнија, каде што брзо се шири шумскиот пожар „Норте“. Најмалку шест куќи се оштетени или уништени, а во гаснењето учествуваат стотици пожарникари, соопштија локалните власти.

Според податоците на противпожарната служба, евакуацијата опфаќа околу 4.600 луѓе, додека речиси 16.000 жители се наоѓаат во загрозеното подрачје.

Во гаснењето на пожарот учествуваат околу 400 пожарникари, а уште 400 се упатени кон погодените области, пренесува Еј-би-си.

Пожарот избувнал во петокот попладне по локално време во Сан Клементе и досега зафатил најмалку 465 хектари.

Повредени двајца пожарникари

Во пожарот нема повредени жители, но двајца пожарникари се здобиле со повреди, соопштија надлежните.

Екипите го гаснат пожарот од земја и од воздух, а граѓаните се повикани да ги избегнуваат загрозените подрачја.

Шефот на противпожарната служба на округот Оринџ, Ти-Џеј Мекгаверн, изјави дека временските услови и конфигурацијата на теренот придонеле за брзото ширење на огнот.

Како мерка на претпазливост, затворени се неколку училишта во рамките на обединетиот училишен округ Капистрано.

Силните ветрови го зголемуваат ризикот од пожари

Пожарот избувнал во период на неповолни услови за гаснење на шумски пожари, вклучувајќи силни ветрови Санта Ана и високи температури.

Предупредувањата за висок ризик од пожари биле на сила до вечерните часови за окрузите Лос Анџелес и Вентура, како и за подножјето на кањонот Антилопа.

Пожарот „Норте“ гори на околу 32 километри северно од пожарот „Хендерсон“, кој избувнал во воената база Камп Пендлтон, во округот Сан Диего. Според објавените информации, пожарот „Хендерсон“ зафатил околу 8.000 хектари.

Локалните власти продолжуваат да ја следат состојбата и апелираат до жителите да ги почитуваат наредбите за евакуација и безбедносните препораки.