(Видео) Крадци ограбија златарница за време на немирите во Франција
Мари Шоке, косопственичка на златарница во Лион, преку снимки од безбедносните камери гледала како крадци ја уништуваат и ограбуваат нејзината продавница за време на протестите на 17 октомври. Во тој период, среде бран на социјални немири, во Франција беа ограбени повеќе продавници. Шоке изјави за LCI дека се јавила во полицијата, молејќи ги да ја заштитат продавницата, но интервенција немало.
„Кога слушам политичари во медиумите како тврдат дека е направено сè што е можно, знам дека тоа не е вистина. Полицијата не добила наредба да биде на вистинското место во вистинското време, а сето ова можеше да се избегне. Целосно сме скршени“, рече Шоке.
По грабежот, владата апелираше до платформите за онлајн препродажба веднаш да ги отстранат сите огласи за кои постои сомневање дека вклучуваат украдена стока.
Иако осигурувањето ќе ја покрие штетата, Шоке напоменува дека почетните трошоци за обновување на златарницата – „Koumal Bijoux“, која ја отворила со својот партнер пред седум години – ќе мораат самите да ги покријат. „Сè ќе обновиме сами, без оглед на исплатата од осигурувањето“, изјави таа.
Крадците од златарницата однеле накит, сеф и неколку телефони „iPhone“. Еден од украдените телефони подоцна бил лоциран во продавница во Во-ан-Велен, град во близина на Лион. Мари Шоке ја известила полицијата, но повторно добила одговор дека тие не можат да интервенираат.
Франција со недели е потресена од протести предизвикани од високите трошоци за живот, растот на цените на горивата и незадоволството од јавните услуги. На протестите им се придружија ученици и студенти, кои бараат подобри услови за образование, повеќе наставници и зголемени инвестиции во училиштата. Мобилизацијата го достигна својот врв во саботата, на 17 октомври, кога повеќе од половина милион луѓе излегоа на улиците низ целата земја.
Во многу градови, протестите прераснаа во насилни судири со полицијата, при што беа запалени автомобили и јавни објекти, а дојде и до масовни грабежи на продавници. Најтешко погодени беа Париз, Лион, Марсеј и Бордо. Во Лион, покрај бројните продавници, беше запалена и градската туристичка канцеларија, додека во Марсеј, демонстрантите упаднаа во градското собрание и предизвикаа голема штета.
Според француските власти, за време на викендот биле уапсени повеќе од 2.300 луѓе, а речиси илјада полицајци и жандарми се здобиле со повреди. Министерот за внатрешни работи, Лоран Нуњез, призна дека полицијата ја изгубила контролата врз ситуацијата за време на немирите и дека безбедносните сили не биле доволно подготвени за размерите на насилството.
