(Видео) Трамп: Она што Русија ѝ го прави на Украина е во ред
Американскиот претседател Доналд Трамп изјави дека Русија се однесува „сосема коректно“ кон Украина и дека „не прави многу“ во земјата што се обидува да ја освои со сила повеќе од една деценија. „Искрено, Русија се однесува сосема коректно во однос на Украина. Тие всушност не прават многу таму“, им рече Трамп на новинарите синоќа, според „Киев индепендент“.
Претседателот ги даде овие коментари истиот ден кога руски напад со беспилотно летало врз парк во Харков – извршен среде бел ден – однесе шест животи, меѓу кои и две деца. Претходната ноќ, Русија го нападна Киев со повеќе од десетина балистички ракети и таргетираше речиси 30 клучни енергетски објекти низ целата земја.
Трамп не ги спомна овие напади. Наместо тоа, тој го пофали рускиот претседател Владимир Путин за неговата наводна воздржаност во Украина, како и кон Иран.
На прашањето дали би бил отворен за трилатерална средба со Путин и кинескиот претседател Ши Џинпинг, Трамп одговори потврдно. Сепак, тој додаде дека таквата средба нема да биде посветена на Украина, бидејќи Русија „се однесува сосема коректно кон Украина“. Според него, главната цел на средбата би била дискусија за нуклеарно разоружување.
Прашањето за тристран самит се појави откако „Волстрит журнал“ објави дека Путин има намера да искористи една таква средба – од која би бил исклучен претседателот Володимир Зеленски – за да обезбеди мировен договор поволен за Москва.
Трамп понатаму изјави дека е подготвен да разговара за Украина со Ши, додавајќи дека кинескиот претседател бил „многу фер кон Украина“.
„Тој не се мешаше премногу, а истото важи и за Русија“, рече Трамп. „Тие не направија ни приближно толку колку што можеа, и јас го ценам тоа.“
Не е сосема јасно дали Трамп мислел на кинеската поддршка за Русија или на руската агресија во самата Украина.
