Италијанската влада денеска соопшти дека се регистрирала како тужител во правната постапка поврзана со пожарот во швајцарското скијалиште Кран-Монтана, во кој загинаа 41 лице, меѓу кои и шест италијански државјани.
Овој потег следува по зголемените тензии меѓу двете земји по трагедијата што се случи за Нова година, како и по неодамнешните барања од швајцарска страна Италија да ги покрие трошоците за лекување на италијанските државјани повредени во пожарот.
Од кабинетот на италијанската премиерка Џорџа Мелони соопштија дека правната постапка е оправдана поради значителните ресурси што италијанската цивилна заштита ги мобилизирала за помош на италијанските жртви.
Во соопштението се наведува и дека постои исклучителна одговорност кај швајцарските локални власти, што, според Рим, го оправдува покренувањето правна постапка против сите одговорни страни.
Во меѓувреме, швајцарските обвинители отворија кривични истраги против француските сопственици на барот каде избувнал пожарот, како и против повеќе локални функционери, меѓу кои и градоначалникот на Кран-Монтана, кој признал дека општината пропуштила повеќе годишни безбедносни инспекции на објектот.
Италијанскиот амбасадор во Швајцарија посочи дека Италија лекувала швајцарски пациенти повредени во трагедијата во една од своите болници и учествувала во спасувачките операции со хеликоптер, без притоа да бара надомест.
