Во текот на изминатиот викенд се чинеше дека е постигнат одреден напредок во мировните преговори меѓу Иран и Соединетите Американски Држави, но американскиот претседател Доналд Трамп им порача на двете страни да не брзаат со постигнување на договорот.
„Или ќе постигнат одличен договор или нема да има никаков договор“, изјави Трамп вчера.
Недолгo потоа, во текот на ноќта, САД изведоа нови напади кои ги опишаа како делување во „самоодбрана“. Напредокот во преговорите, сепак, и покрај ова, се чини дека засега не е прекинат.
Иранските државни медиуми во последните часови објавија кои се клучните „црвени линии“ на Техеран во преговорите со Соединетите Држави.
Иранската новинска агенција ИРНА наведува дека одржувањето на „инфраструктурата на иранската нуклеарна програма“ не е предмет на компромис. Трамп повеќепати истакна дека на Иран не смее да му биде дозволен развој на нуклеарно оружје, додека поединечни извештаи сугерираат дека Вашингтон бара од Техеран предавање на збогатениот ураниум.
Според извештајот, двете страни наводно постигнале „сеопфатен механизам за избегнување на конфликти“ за да се стави крај на борбите.
Меѓутоа, една од клучните ирански црвени линии е „признавањето на правото на Иран на разузнавачки и оперативен надзор над овој важен воден пат“.
Иран веќе подолго време заговара одреден облик на контрола над Ормускиот Теснец во секој поствоен аранжман.
За Техеран е од посебна важност и ослободувањето на иранските финансиски средства блокирани под меѓународни санкции, особено оние кои се наоѓаат во Катар.
