Американскиот претседател Доналд Трамп ја претстави новата државна платформа America.gov, замислена како единствено место преку кое граѓаните со помош на вештачка интелигенција полесно ќе пристапуваат до информации и услуги на федералната влада.
На презентацијата Трамп се пошегува со тврдењата дека платформата можеби е едно од најголемите достигнувања на неговата администрација.
„Ако ова е најголемото нешто што сум го направил, тогаш сум бил многу лош претседател“, рече Трамп.
America.gov им овозможува на корисниците да поставуваат прашања со обичен јазик и да добиваат информации од официјални владини извори, без да пребаруваат низ голем број различни веб-страници. Платформата треба да го олесни пристапот до услуги поврзани со пасоши, Medicare, студентски кредити, државни работни места и други федерални програми. Проектот го предводи Националното студио за дизајн, на чело со коосновачот на Airbnb, Џо Гебија.
Набрзо по стартувањето, платформата привлече внимание и поради одговорите на политички чувствителни прашања. Првично давала одговори за претседателските избори во 2020 година, климатските промени и документите поврзани со Џефри Епстин, но дел од тие одговори подоцна биле променети или системот одбивал да одговори, наведувајќи дека не одговара на политички прашања.
