Украинските сили годинава ослободиле 745 квадратни километри територија што била под руска окупација, изјави украинскиот претседател, Володимир Зеленски.
Според него, украинската војска повторно ставила под контрола 26 населени места во Дњепропетровската, Доњецката и Запорошката област, долж околу 60 километри од фронтот.
„Нашата офанзивна операција беше изведена прецизно – точно според планот“, напиша Зеленски на „Икс“.
Украинските сили во последните месеци изведуваат контраофанзиви на делови од фронтот долг околу 1.200 километри, како и напади врз руската логистичка и енергетска инфраструктура.
Сепак, според картата на фронтот на украинската група DeepState, голем дел од подрачјето сè уште е сива зона, односно територија која целосно не ја контролира ниту една страна. „Ројтерс“ не можел независно да ја потврди снимката што ја објави украинскиот Генералштаб.
Аналитичарите оценуваат дека руското напредување годинава забавило на поголем дел од фронтот, иако руските сили продолжуваат да се приближуваат кон важни градови во Доњецката област.
