Унгарскиот премиер Петер Маѓар најави закон со кој ќе се овозможи проверка на богатењето на политичарите до пред 20 години, а во контролата ќе бидат вклучени и одредени поранешни високи функционери, пишува „Телекс“.
Во видео објавено на Фејсбук во четвртокот, Маѓар вели дека законот ќе биде испратен до унгарскиот парламент без одложување.
„Отсега, е карј на светот во кој политичарите од Фидес цинично пишуваа сè во своите имотни евиденции, додека на сите им беше јасно дека нивниот вистински животен стил и имотот на хартија немаат никаква врска“, рече Маѓар, како што објавија „Телекс“ и „Н1 Сараево“.
Според објавениот предлог, проверките ќе ги опфатат членовите на парламентот, премиерите, министрите, државните секретари, владините службеници.
„Верификацијата за збогатување ќе се однесува на секој пратеник, премиер, министер, државен секретар, владин комесар и комесар на премиерот чиј мандат завршил во последните пет години, а секако и на оние кои моментално ги извршуваат или ќе ги извршуваат овие функции во иднина“, рече Маѓар.
Контролите ќе ги спроведува Унгарската национална даночна и царинска администрација (НАВ).
За актуелните политичари, верификацијата ќе започне по две години од нивното прво назначување. Доколку некој од актуелниот состав на парламентот или владата поднесе оставка или биде разрешен, НАВ, според најавата на Маѓар, автоматски ќе започне проверка во рок од 30 дена.
Доколку за време на постапката политичар или друго лице опфатено со законот имало даночен дефицит од најмалку пет милиони форинти, неговото име, функција и износот на утврдениот даночен дефицит ќе бидат објавени на јавниот список на НАВ.
Предлогот ќе му даде на НАВ потребни овластувања за детални контроли со цел да се утврди дали средствата и животниот стандард на политичарите одговараат на нивниот оданочен приход и евиденција за имот.
„За време на инспекцијата, НАВ ќе открие сè – недвижен имот, банкарски сметки, деловни акции, осигурување, инвестиции и средства што досега се обидуваа да бидат скриени – и ќе ги спореди со евиденцијата за имотот, а потоа ќе направи проценка на ризикот“, рече Маѓар.
Доколку НАВ утврди дека нема неправилности, постапката ќе биде завршена.
Меѓутоа, доколку се открие разлика помеѓу оданочениот приход и средствата, што би можело да укаже на неисполнување на даночните обврски или нелегално стекнат приход, ќе биде покрената детална даночна ревизија.
Клучниот елемент на најавата на Маѓар е можноста за проверка на потеклото и растот на средствата до две децении наназад, додека системот би ги вклучил не само сегашните и идните носители на највисоките позиции, туку и оние чиј мандат завршил во текот на претходните пет години.
Фото: ЕПА
