Xiaomi ја претстави новата серија паметни телефони Xiaomi 18 Pro, за која се очекува да пристигне на глобалниот пазар подоцна оваа година, по првичното лансирање во Кина.
Новите модели привлекуваат внимание, меѓу другото, и поради тоа што се меѓу првите телефони што го користат најновиот мобилен чипсет на Qualcomm – Snapdragon 8 Elite Gen 6. Моделот Xiaomi 18 Pro Max користи помоќна верзија на овој чип.
Уредите беа претставени за време на настанот Snapdragon Summit на Хаваи, а една од нивните најинтересни карактеристики е екранот со вградена заштита на приватноста, слична на технологијата што Samsung ја имплементираше кај Galaxy S26 Ultra.
Целта на оваа функција е да им се отежне на луѓето во близина да ја видат содржината на екранот. Сепак, Xiaomi отиде чекор понатаму нудејќи подетални опции за прилагодување.
Корисниците можат да ја активираат заштитата на приватноста само за одредени апликации, како што се оние за мобилно банкарство. Функцијата не само што ја штити содржината на апликацијата, туку може и да ги скрие известувањата, приказот со поделен екран и пловечките прозорци кога телефонот се гледа од остар агол.
Достапни се и опции за активирање врз основа на локацијата, а предната камера може да детектира потенцијален набљудувач и да му предложи на корисникот да го вклучи режимот за приватност. Функцијата може да се активира и рачно, со помош на страничното копче.
Двата модела имаат LTPO AMOLED екран со променлива стапка на освежување од 1 до 120 Hz, 2K резолуција и максимална осветленост до 4.000 нити. Xiaomi 18 Pro има екран од 6,4 инчи, додека 18 Pro Max доаѓа со панел од 6,9 инчи.
Xiaomi го задржа и секундарниот заден екран, првпат претставен кај претходната генерација на Pro модели. Овој помал екран може да прикажува известувања, а корисниците можат да го користат асистентот Xiaomi Xiao AI за креирање мини-апликации наменети специјално за него.
Двата модела го користат истиот систем на задни камери. Главната камера се состои од сензор од 200 мегапиксели со објектив што има еквивалентна фокусна должина од 23 mm; Тука е и телефото камерата од 200 мегапиксели со објектив од 75 мм, како и ултраширокоаголната камера од 50 мегапиксели.
Батериите се исто така поголеми од оние кај претходната генерација. Xiaomi 18 Pro има капацитет од 7.000 mAh, додека 18 Pro Max располага со огромна батерија од 8.500 mAh. Двата телефона поддржуваат жично полнење со моќност до 100 W, безжично полнење од 50 W и обратно безжично полнење до 27 W.
Основните верзии доаѓаат со 12 GB RAM и 256 GB внатрешна меморија.
Xiaomi 18 Pro и 18 Pro Max ќе бидат достапни во црна, бела, розова и сина боја, како и во специјално црвено издание со делумно проѕирна задна страна. Почетната цена на моделот Xiaomi 18 Pro во Кина изнесува 5.999 јуани (околу 894 долари), додека цената за 18 Pro Max започнува од 6.999 јуани (околу 1.043 долари).
Xiaomi потврди дека планира да ја лансира серијата 18 Pro на глобалниот пазар подоцна оваа година.
