Цукерберг купи готски замок од 19 век во Ирска

Марк Цукерберг купи готски замок од 19 век со поглед на река во југоисточна Ирска, на 200 километри од европското седиште на неговата компанија.

Директорот на Meta и неговата сопруга, Присила Чан, ќе го користат замокот и неговиот имот од 178 хектари како база за време на нивниот престој во Ирска.

„Марк и неговото семејство со нетрпение очекуваат да продолжат да се грижат за овој историски дом и да бидат во Ирска, каде што Meta има свое меѓународно седиште“, изјави портпаролот.

Цената на замокот не е позната, но „Irish Times“, кој прв објави за продажбата, ја процени вредноста на имотот помеѓу 20 и 30 милиони евра. Тоа е околу 10 проценти од вредноста на суперјахтата на Цукерберг од 118 метри.

Замокот е изграден во 1830 година за Џон Кејли, поранешен пратеник од Конзервативната партија, и бил раскошно дизајниран од архитектите Џејмс и Џорџ Ричард Пејн. Според книгата „The Houses of Ireland“, од трпезаријата до кујната се стигнува за „четири и пол минути брзо одење“.