Крај за легендарното студио: EA го затвора BioWare и отпушта вработени; новиот Mass Effect е откажан
BioWare, студиото кое стои зад неколку исклучително популарни франшизи на игри, целосно се затвора.
Промените беа неизбежни за Electronic Arts по преминот на компанијата во приватна сопственост – потег со кој новите сопственици се соочија со долг од 20 милијарди долари. EA најави оперативни промени, вклучително и отпуштања, како и затворање на BioWare – студиото одговорно за серијалите Mass Effect, Baldur’s Gate и Dragon Age.
Во последните години, студиото се соочуваше со потешкотии во работењето; и Anthem (чија поддршка беше прекината претходно оваа година) и Dragon Age: The Veilguard не ги исполнија очекувањата во однос на продажбата. Од EA, компанијата што го презеде BioWare во 2007 година, изјавија дека мал тим бил во рана фаза на развој на новиот наслов од серијалот Mass Effect. Сепак, донесена е одлука тој проект да се откаже, а BioWare целосно да се затвори, вклучително и канцеларијата во Едмонтон, Алберта.
„BioWare е легендарно студио кое помогна да се дефинира жанрот на RPG игри, и оваа одлука не ја донесовме лесно“, се наведува во дописот потпишан од ко-претседателите на EA, Кем Вебер и Дејвид Тинсон.
Според Variety, EA отпушта приближно три отсто од својата работна сила – околу 400 вработени. Од компанијата велат дека ќе им помогнат на погодените вработени во „истражување на други можности“ во рамките на организацијата.
Меѓу студијата погодени од намалувањето на бројот на вработени е и Full Circle, развојниот тим зад франшизата Skate. Во дописот се наведува дека оваа игра, која е достапна во „ран пристап“ (early access) уште од септември минатата година, била многу успешна во привлекувањето играчи. Сепак, EA спроведува промени во студиото за да создаде помал и пофокусиран тим, кој ќе ѝ понуди на заедницата јасен план за развој – потег за кој веруваат дека ќе придонесе за поздраво и поодржливо деловно работење.
Во Maxis, студиото зад серијалот The Sims, EA го запира развојот на проект со кодно име „Project Lotus“, со цел да пренасочи повеќе ресурси кон друга иницијатива, со кодно име „Project Evergreen“.
EA, исто така, даде осврт на тоа што ги очекува другите студија во рамките на компанијата. Покрај работата на проекти во рамките на франшизите Battlefield и Apex Legends (при што втората ќе добие повеќе режими за повеќе играчи), Respawn и Dice соработуваат на нова игра од жанрот „пукачки игри“ (shooter).
Според извори на Variety, станува збор за насловот Star Wars: Battlefront 3. Гласините што се појавија сугерираа дека за развојот на играта се разгледувале неколку студија — вклучително и Bungie — но се чини дека франшизата ќе остане под закрилата на EA. Студиото Dice, исто така, стоеше зад развојот на претходните два наслова од серијалот Star Wars: Battlefront.
