Одлични вести за гејмерите: Дали GTA 6 доаѓа на компјутер порано од очекуваното?
Доколку новиот извештај се покаже како точен, PC гејмерите ќе стапнат во Леонида во GTA 6 уште пред април.
Издавањето на Grand Theft Auto VI во ноември веројатно ќе биде најголемото лансирање во индустријата за забава. Сепак, многу фанови се прашуваат за верзијата за компјутер, која сè уште не е најавена. Иако нема официјална потврда, нов извештај сугерира дека Take-Two и Rockstar ќе објават верзија за компјутер само неколку месеци по лансирањето на верзијата за конзоли.
Извештајот доаѓа од GamesBeat, кои се повикуваат на повеќе извори од индустријата, според кои Grand Theft Auto VI ќе пристигне на компјутер во првиот квартал од 2027 година. Ако ова е точно, PC играчите ќе стапнат во Леонида пред април.
Според медиумот, изворите останале анонимни за „да се избегне нарушување на деловните односи“. Ова може да значи дека информацијата не потекнува од внатрешноста на Take-Two или Rockstar, туку од некој надворешен партнер.
Во годините по првичната најава за Grand Theft Auto VI, Rockstar ги прикажа само верзиите за Xbox Series X|S и PlayStation 5 од овој долгоочекуван наслов.
Кога претходно оваа година беше прашан за верзија за компјутер, извршниот директор на Take-Two, Штраус Зелник, ја опиша публиката на конзоли како нивна „примарна база на корисници“, на која мора да ѝ се даде приоритет.
Игрите развиени од Rockstar обично пристигнуваат на компјутер откако ќе бидат објавени за конзоли. На пример, Red Dead Redemption 2 пристигна на компјутер повеќе од една година по лансирањето на Xbox и PlayStation. Од друга страна, на Grand Theft Auto V му беа потребни речиси две години за да стигне до компјутерите.
Ако најновиот извештај за издавање во првиот квартал од 2027 година е точен, тоа би било едно од најбрзите пренесувања (портови) на нова платформа што компанијата некогаш ги направила.
Како и секогаш, ваквите извештаи и протечени информации треба да се земат со одредена доза на резерва. Иако постои голема веројатност дека се работи на верзија за компјутер, ниту издавачот, ниту развивачот немаат дадено официјални изјави или коментари во врска со датумот на издавање за компјутер.
Grand Theft Auto VI треба да биде објавен на 19 ноември 2026 година за Xbox Series X|S и PlayStation 5.
