ВИДЕО: Украина има одговор за најбрзите руски дронови

Поранешниот украински министер за одбрана, Михаило Федоров – познат по своето залагање за брзи технолошки иновации во војската – претстави нов дрон-пресретнувач наменет за уништување на најбрзите руски борбени беспилотни летала.

Со дронот моментално управува пилот, но Федоров изјави дека планира целосно да го автоматизира со помош на вештачка интелигенција, со цел до крајот на годината да се достигне месечно производство од стотици примероци, пишува „Бизнис инсајдер“.

Украина сè повеќе користи автономни дронови и роботи опремени со вештачка интелигенција. Ваквите системи можат да функционираат независно, дури и во ситуации кога системите за електронско војување ќе ја прекинат врската со операторот. Новиот дрон-пресретнувач претставува одговор на украинските инженери на сè поголемиот број руски беспилотни летала опремени со млазни мотори. Овие летала се значително побрзи од постарите модели со пропелери и претставуваат тешка цел за украинската противвоздушна одбрана. Развојот на овој модел е дел од поширокиот тренд на воведување пресретнувачи со вештачка интелигенција, кои бараат минимална човечка контрола.

Нов пресретнувач против „Геран-5“

Украинските одбранбени компании веќе развија неколку модели на пресретнувачи способни да им се спротивстават на најбрзите руски дронови, „Геран-5“, кои користат мини-турбомлазен мотор за постигнување брзини до 600 км/ч. Точната брзина на новиот пресретнувач не е објавена, но специјализирана единица на Украинската национална гарда со него веќе собори два дрона „Геран-5“ за време на неодамнешните тестирања над Киев.

Федоров потврди дека тестирањата продолжуваат, по што ќе следи усовршување на технологијата и започнување на масовно производство. Тој нагласи дека пресретнувачот ќе биде многу економичен. „Уште од самиот почеток, нашата цел беше да развиеме евтино решение за масовно производство, кое би можело брзо да се имплементира“, изјави тој.

Новиот деловен потфат на Федоров

За време на неговиот шестмесечен мандат на чело на Министерството за одбрана, претходно оваа година, Федоров инсистираше на сеопфатна модернизација на војската, особено преку роботизација. Во тој период беа постигнати значајни воени резултати, првенствено благодарение на употребата на беспилотни летала.

По напуштањето на функцијата во јули, Федоров основаше одбранбена компанија фокусирана на развој на воена технологија, со цел зајакнување на Украина и соработка со меѓународни партнери. На почетокот на септември, тој објави дека првиот инвеститор е Алекс Карп, директор на американската компанија за анализа на податоци и вештачка интелигенција, „Палантир“.

Во понеделникот, Федоров најави дека планира дополнително да инвестира во истражување, развој и во украинскиот инженерски тим што стои зад пресретнувачот. Тој нагласи дека ја смета интелектуалната сопственост на проектот за клучна за неговата нова компанија. Планира да го отвори проектот и за други инвеститори, а првата рунда на финансирање се очекува наскоро.