Легендата на глумата Вилијам Шатнер и неговата ќерка Мелани Шатнер Греч открија дека двајцата се справувале со сериозна дијагноза на рак во последните неколку години.
Двајцата биле лекувани од болеста во четврта фаза, а во интервју за списанието People, тие раскажаа како си помогнале еден на друг да ги пребродат најтешките моменти и дека целото искуство им го променило погледот кон животот.
Сè започнало пред три години, кога Мелани (61) поминувала низ многу тежок период за време на хемотерапијата за рак на дојка.
„Бев целосно скршена. Му се јавив на татко ми среде ноќ и му кажав дека мислам дека умирам“, се присети таа.
Само 15 минути подоцна, Вилијам Шатнер (95) пристигнал на нејзината врата.
„Ме прегрна како што ме прегрна кога бев мало девојче. Ми рече: „Ова е само една фаза од твојот живот. Ќе го пребродиш ова и еден ден ќе биде само сеќавање“, рече Мелани.
Меѓутоа, додека нејзиното здравје почнало да се подобрува, во јуни 2023 година, семејството добило нови тешки вести. На Шатнер му бил дијагностициран малиген меланом во четврта фаза, кој се проширил на неговите бели дробови и мозок.
„Се сеќавам дека си помислив дека немам сила да се грижам за себе, а во исто време се гледам како го губам татко ми“, рече Мелани.
Сепак, Шатнер го задржал својот оптимистички поглед на животот дури и во таа ситуација.
„Ми рекоа: „Имаш рак. Да дојдеше покасно, немаше да преживееш“. Па, тоа е мојот живот. Верувам дека универзумот се грижи за мене“, рече актерот најпознат по улогата на капетанот Кирк во серијата „Ѕвездени патеки“.
Мелани случајно ја почувствувала грутката на градите во јули 2022 година, иако имала нормална мамографија само пет месеци претходно. Во текот на следната година и пол, таа поминала низ хемотерапија, двојна мастектомија и 30 циклуси зрачење.
Во исто време, лекарите почнале да се сомневаат во промена на лицето на Шатнер. Откако семејниот лекар му кажал дека може да станува збор за блокирана жлезда, еден пријател пластичен хирург го советувал да ја отстрани промената.
Се покажало дека станува збор за тумор. По операцијата следеле две години имунотерапија поради метастази што се прошириле на белите дробови и мозокот.
Шатнер бил голема финансиска поддршка за време на третманот на неговата ќерка.
„Ми рече: „Не грижи се за парите, само прати ми ги сметките““, рекла Мелани.
Додаде дека нејзиниот татко се обидувал да ја насмее дури и во најтешките моменти.
„По една година, ми рече: „Мора да се подобриш, инаку ќе банкротираме!““, се присети таа со смеа.
До крајот на 2024 година, и Вилијам и Мелани добија добри вести и беа прогласени за здрави, без знаци на болест.
Тешкото искуство целосно ги променило нивните приоритети.
„Размислувам за чудото на колибрите, моето куче, моите деца. Свесна сум за убавината на сè што нè опкружува“, рекла Шатнер.
Тие решија да го споделат своето искуство со другите преку новиот подкаст „No Time but Now“, во кој ќе разговараат со здравствени експерти и луѓе кои поминале низ тешки животни ситуации.
„Победата над ракот ми го промени животот. Повеќе не се плашам. Чувствувам голема слобода и радост“, рече Мелани.
Шатнер, кој сè уште активно работи и планира да објави нови книги и музички албуми, вели дека денес се чувствува подобро отколку во претходните години.
„Поздрав сум отколку што бев со години. Мозокот е како мускул, мора да го користите постојано“, рече тој.
фото/Depositphotos
