Една од најпрепознатливите победнички на Евровизија, Кончита Вурст, е речиси непрепознатлива неколку месеци откако објави дека се повлекува на неопределено време од евровизискиот контекст. Австриската пејачка која триумфираше во 2014 година со песната „Rise Like a Phoenix“, покажа нов изглед кој е значително различен од оној по кој стана светски позната, пишува LADbible.
Кончита, чие вистинско име е Томас Нојвирт, во последните месеци се појавува во значително поинаква верзија. На средбата со австрискиот претседател Александар Ван дер Белен, таа носеше дискретен син костум со жолто марамче во џебот и црна маица. Нејзината фризура беше исто така повоздржана – косата ѝ беше кратко потстрижена од страна, со уредно потстрижена брада. Изгледот е драстично отстапување од долгата коса и гламурозните фустани кои, заедно со нејзината препознатлива брада, го одбележаа нејзиниот настап во 2014 година.
Таа победи на Евровизискиот натпревар пред 12 години, со што Австрија го доби правото да биде домаќин на натпреварот во 2015 година. Оваа година, финалето на 70-от Евровизиски натпревар ќе се одржи во Виена, во сабота, на 16 мај, што ќе биде трет пат Австрија да биде домаќин на настанот. Нојвирт почна да настапува како Кончита три години пред нејзината победа и ја задржа својата брада како заштитен знак, комбинирајќи ја со женска облека и шминка.
Во објава на социјалните мрежи во јануари, Вурст напиша дека Евровизија „ми го обликувала животот“, но дека е време за „промена“. Во изјава потпишана со „Том“, таа рече: „Евровизија ми го обликуваше животот. Тоа беше мојата сцена, мојот дом и мојата отскочна даска, поглавје за кое сум длабоко благодарна“.
„Како уметник, промената е единствената константа за мене. Отсега па натаму, се повлекувам од евровизискиот контекст. Го префрлам фокусот на други професионални проекти и дозволувам да се развиваат нови работи. Мојата врска со Евровизија останува дел од мојата историја, но тоа веќе не е простор за моите следни чекори. Одлуката е лична и нема да коментирам понатаму“, се вели во објавата.
Михаел Крен, извршен продуцент на Евровизија 2026, одговори на нејзината одлука: „Ја прифаќаме и ја почитуваме одлуката на Кончита Вурст да се повлече од евровизискиот контекст. Нејзиниот придонес е важен дел од историјата на натпреварот во Австрија. Му посакуваме на Том Нојвирт се најдобро во неговите идни проекти.“
Овогодинешниот Евровизиски натпревар ќе биде еден од најконтроверзните во поновата историја, бидејќи пет земји одлучија да не учествуваат поради учеството на Израел. Исланд, Ирска, Холандија, Словенија и Шпанија ја донесоа одлуката поради војната во Газа и континуираното учество на Израел на натпреварот.
Три од петте земји – Шпанија, Ирска и Словенија – отидоа чекор понатаму и објавија дека нема ни да го емитуваат 70-тото издание на натпреварот. Ова е најголемиот бојкот на Евровизискиот натпревар од 1970 година, кога Финска, Норвешка, Португалија и Шведска му го свртеа грбот на натпреварот.
На Евровизискиот натпревар во 2025 година, двајца демонстранти се обидоа да го прекинат настапот на израелскиот претставник Јувал Рафаел. Рафаел, кој го преживеа нападот на Хамас врз Израел на 7 октомври 2023 година, ја изведе песната „New Day Will Rise“.
Фото: ЕПА
