Претседателот на организацијата „Мис Универзум“ се огласи за здравствената состојба на претставничката на Јамајка, Габриел Хенри, откако таа падна на сцената за време на претселекциите. Според него, Хенри добро се опоравува и наскоро треба да биде пуштена од болница, пренесува „Пипл“.
Габриел Хенри падна за време на ревијата на вечерни фустани на 74. избор за Мис Универзум во Бангкок, во средата на 19 ноември, по што беше итно пренесена во болница.
Во објава на Инстаграм, претседателот на „Мис Универзум“, Раул Роча, се осврна на, како што рече, недамнешните шпекулации и нагласи дека сака да ѝ даде на јавноста точни, јасни и со почит ажурирани информации за здравствената состојба на Габриел Хенри.
View this post on Instagram
Тој истакна дека организацијата, од почит кон Хенри и нејзиното семејство, не објавува детали за нејзиното здравје. Додаде дека информациите треба да се споделуваат само во соодветно време и по одлука на семејството или самата Хенри. Роча потврди дека веднаш по нејзиниот пад била преземена брза реакција.
„Лично излегов на сцената за да ѝ помогнам, организирав итна медицинска помош и го надгледував нејзиниот транспорт до болница“, изјави тој. Додаде дека останал со нејзиното семејство во болницата.
Тој наведе дека се воведени и дополнителни мерки на претпазливост, меѓу кои и ангажирање на дополнителни медицински стручњаци, за да се обезбеди најпрецизна процена на нејзината состојба. Потврди дека организацијата „Мис Универзум“ ги покрила сите трошоци за сместување, медицинска нега и патување за Хенри и членовите на нејзиното семејство.
„Последниве четири дена беа исполнети со тешки моменти и неочекувани грижи“, напиша Роча. „Но благодарение на врвната медицинска грижа, сите предизвици беа успешно надминати.“ Тој додаде дека најновиот лекарски извештај потврдува дека Габриел Хенри е во добра здравствена состојба и дека наскоро се очекува да биде пуштена од болница.
„И покрај неоснованите шпекулации што кружат во јавноста, нашиот фокус во целост беше на нејзината грижа и опоравување. Пресреќни сме што е на чекор до отпуштање“, заклучи тој.
По падот, Хенри беше изнесена од сцената на носилки. За време на престојот во Тајланд со неа постојано беа нејзината сестра Филиша Хенри-Самуелс и мајка ѝ Морин Хенри.
Нејзината сестра претходно изјави дека Габриел не се опоравува толку брзо како што се надевале, но дека болницата продолжува да ѝ обезбедува соодветна грижа. Тогаш беше објавено и дека Хенри ќе остане најмалку седум дена на одделот за интензивна нега поради постојан мониторинг на нејзината состојба.
