Доделувањето на американските музички награди (AMAs) за 2026 година, што се одржа синоќа во Лас Вегас, немаше еден доминантен победник. Наместо тоа, дури седум уметници ја поделија титулата за најуспешни, освојувајќи по три награди, и тоа: Бруно Марс, BTS, Карди Би, КЕТСИ, Сабрина Карпентер, HUNTR/X и Сомбр.
Вечерта, сепак, беше разочарувачка за Тејлор Свифт, која влезе на доделувањето како фаворит со осум номинации, но на крајот остана без ниту една статуетка. И покрај ова, Свифт сè уште го држи рекордот како најнаградувана жена изведувач во историјата на наградите AMA со вкупно 40 победи, според Billboard.
BTS повторно прогласени за изведувач на годината
К-поп суперѕвездите BTS ја освоија главната награда на вечерта, изведувач на годината, по втор пат во својата кариера. Тие славеа во оваа категорија за прв пат во 2021 година, што ги прави само четврти изведувач во историјата со повеќекратни победи во таа категорија, во која Тејлор Свифт води со седум победи.
Со две победи, BTS се изедначи со Џастин Бибер и One Direction, а со вторите сега ја делат титулата најнаградувана група во таа престижна категорија.
Покрај тоа, BTS ја освоија и наградата за песна на летото за „Swim“ и наградата за најдобар машки K-поп изведувач, со што нивната вкупна колекција на награди AMA достигна 14.
Ова ги прави втора најнаградувана група или дуо, зад кантри групата Alabama со 23 награди.
Покрај BTS, уште шест други изведувачи имаа причина да слават со по три награди. Глобалната женска група KATSEYE беше прогласена за нов изведувач на годината, а ги освои и наградите за најдобро музичко видео и пробивен поп изведувач. Интересно е што ова е седма година по ред женски изведувач или група да победи во категоријата нов изведувач.
Песна на годината е „Golden“ од HUNTR/X, која ја продолжи својата победничка серија по Греми наградите и Оскарите. Групата освои и награди за најдобра вокална изведба и најдобра поп песна.
Sombr освои три награди – за најдобра рок/алтернативна песна („Back to Friends“), најдобар рок/алтернативен албум („I Barely Know Her“) и пробивен рок/алтернативен изведувач. Неговата победа во категоријата албуми беше изненадување, со оглед на тоа што албумот се искачи на 10-то место на Billboard 200, додека сите други номинирани албуми беа повисоко.
Трикратни добитници се Бруно Марс (најдобар машки R&B изведувач, најдобра R&B песна и најдобар R&B албум), Карди Би (најдобра жена хип-хоп изведувач, најдобра хип-хоп песна и најдобар хип-хоп албум) и Сабрина Карпентер (албум на годината, најдобра жена поп изведувач и најдобар поп албум).
52-та церемонија на Американските музички награди ја водеше Квин Латифа, а церемонијата се емитуваше на CBS и стриминг платформата Paramount+. Тоа е најголемото доделување награди во светот, кое го гласаат обожавателите, започнато во 1974 година од легендарниот продуцент Дик Кларк.
Номинациите се базираат на клучни интеракции на обожавателите, вклучувајќи стриминг, продажба на албуми и песни, радио емитување и приходи од турнеи. Овогодинешното доделување на наградите го опфати периодот од 21 март 2025 година до 26 март 2026 година. Продукцијата е на „Дик Кларк Продакшнс“, компанија во сопственост на „Пенске Медиа Елдриџ“.
фото/ЕПА
