СДСМ: Ребалансот на Буџетот е затоа што нема пари за плати и пензии до крајот на годината
Владата подготвува нов ребаланс на Буџетот поради недостиг од средства за исплата на плати, пензии и покривање на тековните трошоци до крајот на годината, велат од СДСМ.
Членката на Извршниот одбор на партијата, Симона Цветаноски, на денешната прес-конференција изјави дека состојбата со државната каса е катастрофална и дека буџетскиот дефицит ќе надмине 900 милиони евра.
„Целиот планиран дефицит е веќе потрошен, нема пари за плати и пензии и тековни трошоци до крајот на годината. Затоа нов ребаланс. Втор само два месеци после последниот ребаланс“, рече Цветаноски.
Според неа, најавениот ребаланс не е поврзан со мерките за горивата, како што тврди Владата, туку со потфрлањето на буџетските приходи.
„Наместо да скрати од непродуктивните трошења, да го запре луксузот и партиските тендери – повторно нови задолжувања“, обвини Цветаноски.
Таа посочи дека Владата веќе започнала постапка за задолжување од 250 милиони евра за буџетски потреби до крајот на годината, а дека следува и ново задолжување од 1,3 милијарди евра.
