Автомобил влета во луѓе во Германија: повеќе повредени

Во Нојштат ам Рибенберге, во северна Германија, синоќа доцна автомобил влета во група луѓе, при што беа повредени неколку лица.

Полицијата пукаше кон возилото, но тоа побегна од местото на настанот, потврди портпарол на полицијата, пренесува Ekkow.

Инцидентот се случи во сојузната покраина Долна Саксонија, северозападно од Хановер. Повредени се четири или пет лица, од кои некои се здобиле со сериозни повреди. Сите се пренесени во болница и, според последните информации, не се во животна опасност.

Полицајци кои во близина вршеле рутинска сообраќајна контрола биле сведоци на настанот непосредно пред полноќ. Тие отвориле оган во обид да го запрат возилото, објасни портпаролот. Сепак, автомобилот успеал да побегне, а голем број полицајци, заедно со хеликоптер, сега трагаат по осомничениот или осомничените.

Првичните резултати од истрагата укажуваат на тоа дека лицата вклучени во инцидентот најверојатно се познавале меѓусебно. Целосните околности околу настанот сè уште се утврдуваат.