Британија издвојува 710 милиони фунти за заштита на воените објекти и одбрана од дронови
Велика Британија издвојува дополнителни 470 милиони фунти за унапредување на безбедноста на критичните воени објекти низ земјата, додека уште 240 милиони фунти ќе бидат наменети за подобрување на системот за борба против дронови, познат како проект „Пресагијум“, се наведува во одговорот на британското Министерство за одбрана во парламентот, пренесе „Ју-Кеј дифенс џорнал“.
Конзервативниот пратеник од Јужен Шропшир, Стјуарт Андерсон, прашал каков напредок е постигнат во зајакнувањето на отпорноста на напади и други кризни ситуации по објавувањето на Стратешкиот преглед на одбраната.
Лук Полард, министер за одбранбена готовност и индустрија, изјавил дека Министерството за одбрана спроведува низа мерки за зајакнување на отпорноста на земјата.
Мерките вклучуваат заштита на најважните воени објекти, како и планирање на одбраната на земјата во случај на криза или вооружен конфликт.
Според Полард, британската влада работи на идентификување на клучната национална инфраструктура неопходна за функционирањето на земјата и нејзината способност да издржи конфликт и да одговори на него.
Во рамките на овој процес, Министерството за одбрана доставува податоци за базата на информации за критичната национална инфраструктура, во рамките на програмата што ја води Кабинетот на владата.
