Дали храната и суплементите што се рекламираат на интернет се безбедни? Дискусија во Кисела Вода
Денес во Домот на култура „Билјана Беличанец“ во Општина Кисела Вода, по повод Светскиот ден на храната, се одржа едукативна панел-дискусија на тема „Електронска трговија на храна, медиумска промоција и рекламирање на храна, додатоци во исхраната и храна за спортисти – вистинска приказна или заблуда?“.
Настанот, кој на едно место ги собра претставниците од Општина Кисела Вода, Агенцијата за храна и ветеринарство и Институтот за јавно здравје, имаше за цел да ги отвори важните прашања за влијанието на дигиталните платформи врз изборот на храна и заштитата на здравјето на граѓаните.
На настанот свое обраќање имаше градоначалничката на Општина Кисела Вода, Бети Стаменкоска Трајкоска, која истакна:
„Ова не е тема која ги засега само младите луѓе и оние кои активно спортуваат и посетуваат теретани. Ова е прашање што допира до секое семејство. Од најмладите кои гледаат реклами за енергетски пијалаци, до повозрасните кои бараат суплементи и додатоци за подобро здравје. Многу често зад убаво спакуваната реклама стои прашањето што е вистинска приказна, а што е само маркетиншка заблуда која може да биде и штетна. Наша обврска како институции е да ги заштитиме сите граѓани, помагајќи им да научат како да ги препознаваат вистинските информации и како да донесуваат здрави и безбедни одлуки.“
Директорот на Агенцијата за храна и ветеринарство, д-р Оливер Миланов, во својот говор посочи на важноста на безбедноста на храната:
„Годинашното мото “Иновирај денес. Нахрани ја иднината” не потсетува дека иднината на храната ја создаваме со одлуките што ги носиме денес. Науката, новите технологии, дигитализацијата, вештачката интелигенција и прецизното земјоделство, заедно со претприемништвото и традиционалното знаење, можат суштински да ги трансформираат агропрехранбените системи. Но, вистинскиот напредок не се мери само со количината на произведена храна, туку и со нејзината безбедност, хранлива вредност, достапност и влијанието врз животната средина. Не е доволно да произведуваме повеќе. Мораме да произведуваме подобро, поодговорно и побезбедно и за луѓето и за животните“. Додаде дека преку официјалните контроли, надзорот над храната и храната за животни, ветеринарното јавно здравство, следливоста и управувањето со ризиците, Агенцијата за храна и ветеринарство работи на заштита на здравјето на граѓаните, здравјето и благосостојбата на животните и безбедноста на целиот прехранбен синџир.
Директорката на Институтот за јавно здравје, д-р Марија Андоновска, посочувајќи ја улогата на Институтот, нагласи:
„Покрај прашањето дали во храната е присутен одреден микроорганизам или хемиска супстанција, важно е да се утврди и какво е нејзиното потенцијално влијание врз здравјето, кои групи се најизложени и дали се потребни дополнителни испитувања, надзор или соодветни мерки. Токму поврзувањето на лабораториската експертиза со јавно-здравствената проценка е една од најважните вредности што Институтот ги внесува во националниот систем за безбедност на храната. Нашата определба е да продолжиме со унапредување на лабораториските капацитети, јакнење на стручниот кадар и развој на научно заснован пристап во проценката на ризиците. Веруваме дека соработката меѓу институциите, размената на знаења и координираното делување се неопходни за ефикасен систем за безбедност на храната. На крајот, нашата заедничка цел е јасна: да обезбедиме побезбедна храна, навремено препознавање на здравствените ризици и повисоко ниво на заштита на здравјето на граѓаните.“
Како панелисти на стручната дискусија учествуваа Светлана Колариќ, Радмила Јовановиќ Николовска, Жанета Мијоска и Никола Савовски. За време на панелот беа отворени значајни прашања поврзани со светската статистика за разболувања од небезбедна храна, процедурите при повлекување на небезбедни пратки од пазарот, позитивните и негативните страни на онлајн купувањето на храна, како и популарноста на додатоците во исхраната. Посебен фокус беше ставен на агресивното рекламирање на производи за слабеење и енергетски пијалаци насочено кон младите, и важноста потрошувачите да бидат свесни за можните негативни последици од следењето на ваквите трендови.
Она што е особено значајно е присуството на младите на овој настан. Во публиката, покрај граѓани, присуствуваа и ученици од ветеринарното училиште СУГС „Браќа Миладиновци“, СУГС „Васил Антевски – Дрен“, како и основци од ученичкиот парламент при општинските основни училишта во Кисела Вода, кои имаа можност директно да се едуцираат за овие важни теми.
