Европскиот парламент изгласа тригодишно одложување на построгите правила за увоз на нафта и гас

Европскиот парламент изгласа тригодишно одложување на примената на правилата за емисии на метан при увоз на нафта и гас. Одлуката следува по притисокот од неколку влади, меѓу кои и оние на Франција и Соединетите Американски Држави, пренесува „Ројтерс“.

Со предлогот, рокот за увозниците на сурова нафта, природен гас и јаглен се продолжува до 31 мај 2031 година. До тогаш тие ќе мора да докажат дека нивните договори за снабдување, склучени или обновени по 4 август 2024 година, опфаќаат исклучиво горива за кои се применуваат мерки за следење, известување и проверка на емисиите, еквивалентни на оние во ЕУ.

Метанот е вториот најголем причинител на климатските промени, веднаш по јаглеродниот диоксид.

По гласањето во Европскиот парламент следуваат преговори со владите на земјите членки за усогласување на конечната верзија на законските измени.