Куба се подготвува за можен американски воен напад
Куба се подготвува за можен американски воен напад по изјавите на американскиот претседател Доналд Трамп, кои беа протолкувани како закана за воена интервенција. Ова го изјави кубанскиот претседател Мигел Дијаз-Канел, кој порача дека земјата е подготвена да се брани од секоја странска агресија.
„Одлучни сме да го одбиеме секој обид за странска воена агресија врз нашата земја“, рече Дијаз-Канел.
Тој нагласи дека Куба е мирољубива земја и дека не претставува закана за националната безбедност на САД.
Изјавата следува откако Трамп во разговор со радио-водителот Хју Хјуит беше прашан дали би размислил за воена интервенција со цел да ја „ослободи“ Куба.
„Сакам да ја решам Куба пред да си заминам“, одговори американскиот претседател.
Тој додаде дека САД внимателно ја следат ситуацијата на островот, оценувајќи дека земјата е во многу лоша состојба и дека практично е пропадната држава. Мандатот на Трамп завршува во јануари 2029 година.
Дијаз-Канел ги критикуваше честите изјави на американски политичари за можна воена акција против Куба, без директно да го спомене Трамп.
Кубанскиот претседател ова го изјави за време на одбележувањето на Денот на националната одбрана во Бојерос, јужно од Хавана, на кое присуствуваа високи воени офицери, членови на Комунистичката партија и локални функционери.
Куба одржува воени вежби
Куба редовно одржува воени вежби и состаноци за координација на одбраната од јануари, кога САД спроведоа воена операција во Венецуела, при што претседателот Николас Мадуро беше уапсен и однесен во САД.
Во рамки на кубанската одбранбена стратегија, наречена „Војна на целиот народ“, војниците спроведуваат и основна воена обука за цивилното население.
Трамп и претходно во неколку наврати ја споменуваше можноста за американска воена интервенција на Куба.
Во октомври, пред американските избори на средината на претседателскиот мандат, тој сугерираше дека американските воени бродови, по враќањето од војната со Иран, би можеле да се упатат кон Куба и да останат покрај нејзиниот брег.
Тогаш рече дека кубанските лидери би се предале во такво сценарио.
