„Хил“: Американската војска подготвила планови за нови напади врз Иран

Американската војска подготвила опции за можни нови напади врз Иран, кои би можеле да бидат разгледани по ноемвриските меѓуизбори во САД, објави весникот „Хил“, повикувајќи се на информации за воените подготовки.

Според извештајот, Централната команда на американската војска (ЦЕНТКОМ) му презентирала на министерот за одбрана Пит Хегсет планови за можни воени дејствија против Иран. Станува збор за сценарија што би можеле да бидат активирани доколку претседателот Доналд Трамп одлучи да ја обнови воената акција против Техеран.

Весникот наведува дека Трамп засега ги остава отворени различните опции, но евентуалните напади би зависеле од одлука на Белата куќа. Подготовката на воени планови не значи дека е донесена конечна одлука за нивно спроведување.

Во меѓувреме, дипломатските напори за решавање на спорот со Иран се во застој, што дополнително ја усложнува ситуацијата. Според „Хил“, американската администрација разгледува различни можности во услови на продолжени тензии со Техеран.

Евентуалното обновување на американските воени напади би можело да има пошироки последици за безбедноста на Блискиот Исток, регион во кој односите меѓу САД и Иран со години се обележани со сериозни несогласувања.