Вторник, 17 ноември 2026МаркетингКонтакт
Пребарај

НАТО и Пентагон денеска разговараат за можно повлекување на американските војници од Европа

Сојузниците во НАТО денеска ќе разговараат со Елбриџ Колби, задолжен за стратегија во Пентагон, за американската ревизија на бројот на војници во Европа. Германскиот министер за одбрана, Борис Писториус, изјави дека очекува поконкретни информации за можното повлекување во следните неколку недели, пренесува Ројтерс.

Ревизијата, која почна во јуни по иницијатива на американскиот министер за одбрана Пит Хегсет, има цел да ги поттикне европските сојузници да преземат поголема одговорност за сопствената одбрана. Во Европа моментално се распоредени околу 80.000 американски војници, од кои 35.000 во Германија.

„Очекуваме промени во бројот на војници, но сè уште немаме ништо конкретно“, изјави Писториус пред состанокот на министрите за одбрана на ЕУ во Брисел.

Според европски воени извори, Вашингтон би можел да премести една бригада од околу 5.000 војници од Германија во Азија или во Полска. Резултатите од ревизијата се очекуваат пред Божиќ.

Писториус нагласи дека европските сојузници сакаат да ги координираат потезите со Вашингтон за да се избегнат празнини во европската одбрана.

Во меѓувреме, Колби ќе учествува и на состанок на Контакт-групата за одбрана на Украина, позната како групата Рамштајн, на кој ќе се разговара за дополнителна воена помош за Киев.

Германија и Норвешка ќе финансираат нов пакет американско оружје за Украина, вклучувајќи ракети за противвоздушниот систем „Патриот“. Берлин за пакетот ќе издвои 300 милиони долари, најави Писториус.

Поврзани вести