Рускиот министер за одбрана ги обвини НАТО, ЕУ и Украина за намерно зголемување на тензиите
Рускиот министер за одбрана, Андреј Белоусов, ги обвини НАТО, Европската Унија и Украина дека намерно ги заоструваат односите со Русија и Белорусија, предупредувајќи и на забрзаното вооружување на европските земји.
„Воено-политичката ситуација околу нашите земји и понатаму е тешка. Гледаме нагло зголемување на тензиите и агресивното дејствување на Западот кон Русија и Белорусија. НАТО, ЕУ и режимот во Киев намерно одат по патот на ескалација“, изјави Белоусов на заеднички состанок на претставници на министерствата за одбрана на Русија и Белорусија, пренесува руската агенција ТАСС.
Тој оцени дека особена опасност претставува забрзаната милитаризација на Европа, која, според него, го пренасочува своето индустриско производство за воени потреби и подготвува инфраструктура за брзо распоредување вооружени сили.
Изјавите доаѓаат во период кога европските членки на НАТО ги зголемуваат трошоците за одбрана и ги зајакнуваат воените капацитети поради безбедносните последици од руската инвазија врз Украина. НАТО овие мерки ги претставува како зајакнување на одбраната и одвраќањето, додека Москва ги смета за закана за сопствената безбедност.
